Прокурордук чаралардын жыйынтыгында мамлекетке 11 млн сомдон ашык каражат өндүрүлдү. Бул тууралуу Башкы прокуратурадан билдиришти. Маалыматка ылайык, Ысык-Көл районунун прокуратурасы тарабынан Тору-Айгыр-Тамчы айыл өкмөтүндө жер мыйзамдарынын аткарылышына текшерүү жүргүзүлгөн. Текшерүүдө аталган айыл өкмөттүн аймагындагы 855 га жер тилкеси "өнөр жай, транспорттун, байланыштын, коргонуу жана энергетика тармактарынын жерлери" категориясына которулуп, күн электростанциясын долбоорлоо жана куруу пландалган. Бирок, текшерүүдө жергиликтүү мамлекеттик органдардын аракетсиздигинин натыйжасында айыл чарба жоготуулардын жана алынбай калган пайданын орду толтурулбай, чыгым өндүрүлбөй калгандыгы аныкталган. Келтирилген прокурордук актынын негизинде мамлекетке 11 млн 170 миң 745 сом акчалай өндүрүлдү.
Өлкөдө асыл тукум мал чарбасын өнүктүрүүгө 3 пайыздык жеңилдетилген насыя берүү ишке ашууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти. Мекеменин маалыматына караганда, учурда өлкөнүн азык-түлүк коопсуздугун камсыз кылуу, мал чарбасын өнүктүрүү жана фермерлердин жашоо шартын жакшыртуу максатында мамлекет тарабынан бир катар колдоолор көрсөтүлүүдө. Анын ичинен:малдын ден соолугун сактоо максатында эпизоотиялык абалдын туруктуулугу камсыздалып, мамлекет тарабынын каржылануучу 9 ооруга каршы вакциналар узгултүксүз жана акысыз берилүүдө; ири мүйүздүү асыл тукум мал чарбасын өнүктүрүүгө 3% жеңилдетилген насыя берүү ишке ашырылууда; асыл тукум малды көбөйтүү максатында жасалма уруктандыруу үчүн букалардан алынган уруктук материал, суюк азот жана 160дан ашуун шаймандар республиканын ар аймагына таратылып жатат; Ошондой эле тоют базасын чыңдоо максатында жайыттарга урон себилип, асыл тукум чарбаларга мамлекеттик фонддун жерлери бөлүнүп берилүүдө.
Кыргызстан 2028-жылы өтө турган Олимпиада оюндарына 30 лицензия алууну көздөп жатат. Анын ичинде фехтование, байдарка жана каноэде сүзүү, оор атлетика, таэквондо сыяктуу спорттун түрлөрү бар экенин минкабдан билдиришти. Ал эми паралимпиада оюндарынан спорттун 4 түрү боюнча 4 лицензия алуу пландалганы айтылды.