Бишкекте Кыргыз-Россия достук ооруканасынын курулушу Кыргызстанда медициналык билим берүү менен адистерди даярдоо деңгээлин жакшыртмак. Бул тууралуу Россия Илимдер академиясынын академиги, Россиянын Билим берүү академиясынын президентинин орун басары Геннадий Онищенко Sputnik агенттигинин маалымат борборунда билдирди.3-апрель күнү Кыргызстандын саламаттык сактоо министри Эркин Чечейбаев Россиянын саламаттык сактоо министринин орун басары Андрей Плутницкийге Бишкекте Кыргыз-Россия достук ооруканасын салууну сунуштаган. Ал курулуш сапаттуу медициналык жардамдын жеткиликтүүлүгүн арттырып, Россиянын алдыңкы клиникаларынын катышуусу менен жергиликтүү кадрларды даярдоо үчүн платформа болуп каларын белгилеген. Онищенконун айтымында, эгер долбоорго Россия да акча бөлө турган болсо, бул жай практикалык билим берүүнүн олуттуу платформасына айланат. "Дарыгерге теория менен бир нерсе үйрөтүү мүмкүн эмес. Ал бейтаптын жанында туруп үйрөнөт, өмүр бою окуйт. Мындай клиника баштапкы медициналык билим ала турган, дипломго ээ болгондон кийин да окуй турган жер болмок. Республиканын бардык жагынан дарыгерлер келип, кесипкөйлүгүн арттырат", — деди академик. Онищенко аталган долбоордун маанилүү экенин белгилеп, бардык жагынан колдоого чакырды.
Эми жарандык авто жоопкерчиликти камсыздандыруу полиси Tunduk колдонмосунда санарип документ катары жеткиликтүү. Бул тууралуу Санариптик өнүктүрүү министрлигинен билдиришти. Маалыматка ылайык, жарандар полисти телефондон керектүү учурда оңой көрсөтүүгө болот. Мындан улам аны жоготуп алуу коркунучу да жокко чыгарылды. Ошондой эле кагаз көчүрмөсүн ташып жүрүүнүн кереги жок. Жарандар камсыздандыруу полисин телефонунан көрүү үчүн Tunduk тиркемесинен Санарип документтер бөлүгүнө кирип, ОСАГОну текшерүү керек.
Европанын азыркы эмоционалдык абалы акылдан айныган чекке жакындап калды, европалыктар согуштан башка нерсени оозана албай калгандай. Бул тууралуу РФ президентинин маалымат катчысы Дмитрий Песков айтканын РИА Новости жазды. Анын айтымында, мындан улам Украинага Батыштан курал-жарактын ташылышы боюнча кандайдыр бир божомол жасоо кыйын. "Биздин бул боюнча кабарыбыз жок. Азырынча европалыктардын согуштан башканы оозана албай, жаңжалды узартуу үчүн курал сатып алууга ого эле көп акча жумшоого даярдыгын гана көрүп турабыз. Мындай акылдан айныган чекке жакын эмоционалдык абалын карап туруп бир нерсе деш, албетте, кыйын", — деди Песков.Кремлдин өкүлү "АКШ президенти Дональд Трамптын Украинага деп европалыктардын Америкадан курал сатып алуусу тууралуу сөзү Киевге ок-дары азыраак жөнөтүлөрүн түшүндүрөбү?" деген суроого жооп берген.