Президенттин иш башкаруучусу Каныбек Туманбаев Балыкчы шаарынын мэри болгон Баатырбек Жантаев бөлөсү экенин айтты. Ал жаңы дайындалган калаа башчыны жамаатына тааныштырган.Президенттин иш башкаруучусу негизги критерий тууганчылык же тааныштык эмес, иштөө жөндөмдүүлүгү жана эл үчүн кызмат кылуу экенин белгиледи. Ошондой эле ал туура эмес иштесе мыйзам чегинде жоопко тартыларын кошумчалады. Туманбаев, мындан тышкары, Балыкчы шаарына 1 миллиард сом бөлүнөрүн, натыйжада калаа башкача болуп өзгөрөрүн кошумчалады. Эске салсак, буга чейин Балыкчынын жетекчиси Султан Кермалиев иштен алынып, ордуна Баатырбек Жантаев дайындалган.
Суу ресурстары, айыл чарба жана кайра иштетүү өнөр жайы министрлиги дыйкандарга ашкөк, салат жалбырагы, жүсай, петрушка жана кинза өстүрүүнү сунуштап, кирешесин санап берди. Мисалы, ашкөктү 10 сотых жерге эгүүдө чыгым 10-20 миң сомду түзсө, килограммы 100-200 сомдон сатылса, таза киреше 30 миң сомго жетиши ыктымал. Ал эми салат жалбырагы 1,5 тоннага чейин түшүм берип, базар баасы 250 сомдон болгондо таза киреше 350 миң сомго чейин жетиши мүмкүн. Жүсайдан эки-үч ирет түшүм алууга болот, орточо 60-90 миң сом киреше алып келиши мүмкүн. Петрушка менен кинза эң жогорку түшүм берген өсүмдүктөрдүн катарында. Жалпысынан 2,5 тонна түшүм алып, базар баасына жараша 230 миң сомдон ашуун таза киреше көрсө болот. Ошол эле учурда базар баасынын, аба ырайынын туруксуздугу, суроо-талаптын начардыгы жана жеткирүү системасынын жакшы уюштурулбагандыгы кирешенин төмөндөшүнө себеп болушу мүмкүн экени кошумчаланган.
ЕАЭБде маркалана турган товарлардын тизмеси кеңейтилди. Бул тууралуу ЕЭКтен билдиришти. Комиссиянын Бажы-тарифтик жана тарифтен тышкаркы жөнгө салуу департаментинин директорунун орун басары Аскат Беков чечим Минскиде кабыл алынганын, система жасалма продукцияны азайтып, таза иштеген компаниялардын санын жана бюджетке түшкөн каражатты көбөйтөрүн айтты. "Жаңы товарлар мурункудай эле бирдиктүү эрежелер боюнча маркаланат. Коддор уюм ичинде таанылат. Бул керектөөчүлөрдүн укугун коргоого багытталган. Товар сатып алып жаткан кардар анын жарактуу мөөнөтүн, кайсы жерде, кайсы убакта чыгарылганын жана мыйзамдуу жол менен алып келингенин биле алат", — деди Беков. Ошондой эле мындан ары велосипед, анын рамалары, дезинфекциялоочу каражаттар, микробго каршы косметикалык продукциялар, бекире жана лосостун икрасы, айрым майлоочу материалдар маркаланышы керектиги кошумчаланды.
Урмат Абдукаимов Кыргызстандын футбол боюнча улуттук курама командасынын убактылуу башкы машыктыруучусу болуп дайындалды. Бул тууралуу Кыргыз футбол биримдигинен билдиришти. Маалыматка ылайык, мындай чечим улуттук командага жаңы машыктыруучу изделип жаткандыгына байланыштуу кабыл алынды. Эскерте кетсек, буга чейин бул кызматты аркалаган Максим Лисицын башкы машыктыруучулук кызматтан кеткен. Урмат Абдукаимов — АФКнын A, B жана C категориядагы лицензияларга ээ, тажрыйбалуу адис. Ал буга чейин улуттук курамада башкы машыктыруучунун жардамчысы болуп иштеген, учурда Премьер-Лиганын "Талант" клубунун башкы машыктыруучусу болуп саналат. Буга чейин FIFA Talent Development Scheme долбоорунун алкагында аналитик катары да иш алып барган.