БИШКЕК, 7-июл. — Sputnik. Орус тили КМШнын бардык өлкөлөрүн бириктирет. Бул тууралуу "Аймактык интеграциянын эл аралык борбору" автономдук коммерциялык эмес уюмунун башкы директорунун орун басары Александр Лукашин билдирди.
"Евразиянын жүрөгүнө саякат" эл аралык экспедициясы Кыргызстанга келди, анын курамында 100 адам бар. Катышуучулар Москвадан июнь айынын башында чыгып, 50 күндүн ичинде Россия, Кыргызстан, Казакстан, Өзбекстан жана Тажикстандагы 30 шаарга барууну пландап жатат. Ар бир жерде бизнес-форумдар, илимий сессиялар, маданий жана медиалык иш-чаралар өткөрүлөт.
Караколдо алар Борбор Азиядан келген ишкер аялдарды жана жетекчилерди чогулткан "Аялдар диалогу" форумуна катышышты. Анда жеке долбоорлор, анын ичинде электрондук коммерцияны санарип платформаларда илгерилетүү талкууланды. Мындан соң экспедиция Ысык-Көлдүн түштүк жээги менен Бишкекке жөнөдү.
"Азыр борбор калаада бир эле учурда үч иш-чара өтүп жатат. "Санариптик диалог", орус тилин үйрөнүү келечеги жана Москва автомобиль жолдору институтунун линиясы боюнча Борбор Азиядагы логистика форуму өткөрүлүүдө. Жалал-Абад жана Ош шаарларында санариптик ишкердикти өнүктүрүү жана гуманитардык күн тартибин илгерилетүү боюнча иш-чаралар пландаштырылган", — деди Лукашин Sputnik Кыргызстандын маалымат борборунда.
Экспедициянын катышуучулары орус тилин жайылтуу алардын кыймылынын зарыл бөлүгү деп эсептешет.
"Орус тили — беш өлкөнүн тургундарын бириктирип турган нерсе. Улуу Ата Мекендик согуштагы Жеңиштин 80 жылдыгы белгиленип жаткан жылы муну өзгөчө белгилөө зарыл", — деди Лукашин.