БИШКЕК, 7-июл. — Sputnik. 1-3-августта Ысык-Көлдө өтө турган "Рух Санат" фестивалына дүйнөнүн 51 өлкөсүнөн өнөрпоздор келет. Бул тууралуу уюштуруучулар билдирди.
Маалыматка ылайык, иш-чарага салттуу музыка аткаруучулары, илимпоздор, продюсерлер жана башка өнөр ээлери болуп жалпы 133 талант катышарын ырастады.
Эл аралык фестиваль үч негизги багытты камтыйт:
аткаруучулар сынагы;
илимий-практикалык конгресс;
"Маркет" — маданий тажрыйбалардын жана идеялардын жарманкеси.
"Аталган фестиваль биринчи ирет өткөрүлүүдө. Ал салттуу музыка аркылуу дүйнө элдеринин мурасын чагылдырган ири эл аралык маданий иш-чара болот деген үмүт бар", — деп айтылган маалыматта.
Фестиваль министрлер кабинети, Маданият, маалымат, жаштар саясаты министрлиги, Улуттук илимдер академиясынын Салттуу маданият жана искусство борбору, Түрк маданий мурастар фонду жана "Манас" театры тарабынан уюштурулуп жатканы кошумчаланды.