БИШКЕК, 26 июн — Sputnik. Бишкекте милициянын кызматкери аялды жаакка чаап жиберген видео соцтармактарга тарады.
Свердлов РИИБи аял милицияга 17-июнда кайрылганын билдирди. Ал 17-май күнү саат 20:00 чамасында ГЭС-5тин аймагында О. аттуу киши мас абалында ага кол көтөргөнүн билдирген.
"Факт каттоого алынып, материалдар прокуратурага териштирүү жүргүзүү үчүн өткөрүп берилген", — деди РИИБ.
УКМК 38 жаштагы шектүү колго түшүрүлүп, убактылуу кармоочу жайга киргизилгенин тастыктады. Мекеме ошондой эле кармалган киши Ички иштер министрлигинин атайын багыттагы полкунун кызматкери, милициянын капитаны Р.О.Б экенин тактады.
© Фото / пресс-служба ГКНБ КР
Аталган факт боюнча Кылмыш-жаза кодексинин "Бейбаштык" беренеси менен кылмыш иши козголду.
Ушул эле киши былтыр июнда дарыгерди чаап жиберип, кылмыш иши козголгону айтылды.