БИШКЕК, 26-июн. — Sputnik. Бишкекте курулушу бүтө элек үйлөрдүн биринен террордук топко тиешелүү делген курал-жарак, ок-дары табылды. Бул тууралуу шаардык милициядан билдиришти.
Жашыруун жай "Ислам мамлекети" террордук уюмунун жана уюшкан кылмыштуу топтун 46 жаштагы мүчөсү Ж.Т. (Тоха каймана аты менен белгилүү) тарабынан уюштурулганы белгиленди.
Алынган куралдар:
үч даана жардыргыч зат;
сериялык номери жок, октолбогон 9 мм калибрдеги Макаров тапанчасы (ПМ);
беш кол граната;
ар түрдүү калибрдеги 500дөн ашуун ок-дары.
Ошондой эле Р.А. аттуу жаранга таандык күбөлүк, маркум К.Асанбек (Көлбаев К.А.), анын жан сакчысы жана Ж.Т. (Тоха) менен бирге түшкөн түстүү сүрөт табылган.
Ж.Т. 2015-жылы Панфилов жана Горький көчөлөрүнүн кесилишиндеги атайын операция маалында "Ислам мамлекети" террордук-экстремисттик тобунун мүчөлөрүнүн курамында өлтүрүлгөнү айтылды.
* Кыргызстанда ишмердүүлүгүнө тыюу салынган уюм