БИШКЕК, 26-июн. — Sputnik. Министрлер кабинетинин төрагасынын орун басары Эдил Байсалов Чолпон-Ата шаарында өтүп жаткан Ысык-Көл шайлоо форумуна катышканын өкмөттүн маалымат кызматынан кабарлашты.
Ал Кыргызстан эл аралык деңгээлде таанылган эркин жана адилеттүү шайлоолорду камсыз кылууда жетишкен ийгиликтери менен сыймыктанарын белгиледи. Байсалов 2021-жылы атаандаштыкка жөндөмдүү шайлоодо президент Садыр Жапаров, кийин парламенттин азыркы курамы шайланганын эске салды.
"Эл тарабынан шайланган президенттин жетекчилиги астында өлкө тездик менен өнүгүүдө. Бюджеттин кирешеси үч, экономика эки эсеге көбөйдү. Ал эми ИДПнын өсүшү үч жылдан бери 9 пайыздан ашык болууда. Быйыл биз 10,5 пайыздык өсүшкө жетүүнү пландоодобуз", — деди Байсалов.
Ошондой эле минкаб башчысынын орун басары 2030-жылга чейинки улуттук өнүгүү программасы, көп мандаттуу округдарга өтүүнү жана аялдар үчүн милдеттүү 30 пайыздык квотаны карай турган жаңы шайлоо реформасы бекитилгенин эске салды.
"Бүгүнкү Кыргызстан — бийлик элге тиешелүү, багыты бир, жетишкендиктери көз көрүнөө болгон мамлекет: жолдор, мектептер, ооруканалар курулуп, миңдеген үй-бүлөлөр жаңы турак жайга көчүп кирүүдө. Биздин өлкө ыкчам, тез өнүгүүдө", — деди ал.
Эске салсак, бүгүн, эртең Чолпон-Атада "Шайлоого катышуунун заманбап ыкмалары: теориядан практикага" темасында форум өтүүдө. Иш чара БШК тарабынан уюштурулуп, КМШ өлкөлөрүнүн, Түркиянын, Эстониянын, Монголиянын шайлоо органдарынын, эл аралык уюмдардын жана жарандык коомдун өкүлдөрү катышууда.
Форумдун алкагында пленардык жыйындар, тегерек столдор өтүп, шайлоо жабдууларын көрсөтүп жатышат. Жаштардын катышуусу, санариптештирүү жана эл аралык тажрыйба алмашуу маселелерине өзгөчө көңүл бурулууда. Ошондой эле КМШ өлкөлөрүнүн шайлоо органдарынын жетекчилеринин консультативдик кеңешинин жыйыны болду.