Кыргызстан 120дан ашык жаранга пенсия чектеди, учурда башка да арыздар каралып жатат. Бул тууралуу Жылдыз Кулжанова Sputnik Кыргызстан радиосунун эфиринде маек куруп жатып билдирди.
Анын айтымында, Россия Кыргызстандын 82 жаранына, Корея Республикасы 145, Түркия бир жаранга пенсияга чегерген.
"2019-жылдын 20-декабрында ЕАЭБге мүчө мамлекеттердин эмгекчилерин пенсиялык камсыздоо жөнүндөгү макулдашууга кол коюлган. Ага миграция маселеси себеп болду. Анткени чет өлкөдө убактылуу жашап жана иштеп жаткандардын кирешеси биздин өлкөдө катталбайт. Алар бизге социалдык төлөмдөрдү төлөбөгөндүктөн пенсия алуу мүмкүнчүлүгүнөн ажырап калышмак. Учурда жогорудагы макулдашуунун негизинде чет мамлекетте иштеп, социалдык төлөмдөрдү төлөгөн жарандардын пенсиялык укуктары калыптанып жатат. Эгер жаран мекенине кайтып келем десе, убактылуу жашап-иштеген өлкөсү жарандын камсыздандыруу төлөмдөрүнө жана мыйзамдарына жараша пенсиясын экспорттоп төлөп берет", — деди Кулжанова.
Ал белгилегендей, ЕАЭБге кирген өлкөлөр миграцияга келген жарандарына пенсия чегерип берүү милдеттемелерин алышкан.
"ЕАЭБ өлкөлөрүнүн жарандарына пенсия чегерүү атайын жобонун негизинде ишке ашырылат. Мисалы, кыргызстандык жаран Беларустан пенсия алуу үчүн ал жакка барбастан, биздин Соцфондго кайрылат. Документтер тактоону жана тастыктоону талап кылбайт. Ал эми майыптыгы боюнча пенсия чектөөдө да ал өлкөгө барып отурбай эле документтерин бизге өткөрөт, биз аларды ошол мамлекетке жөнөтүп, ошонун негизинде пенсиясын чектеп беришет. Россия Кыргызстандын 82 жаранына пенсия чектеп берди. Ал эми Түркия менен болгон келишимде камсыздандыруу төлөмдөрү гана эмес, социалдык төлөмдөр да камтылган. Түркия боюнча айтсак, 355 сурам түштү. Алардын баарын тастыктап жөнөттүк, учурда бир жараныбызга гана чегерилди. Корея менен келишим түзүлгөн, аларда топтомо пенсиялык системасы иштейт, биздин жарандар топтомо пенсиясын ала албай калса Соцфондго кайрылса болот. Учурда биздин 145 жаранга Корея Республикасы тарабынан төлөмдөр которулуп, орточо баасы 3642 долларды түздү", — деди Кулжанова.
Ал учурда пенсияны жогорулатуунун пайызы, суммасы каралып жатканын кошумчалады.