М.С. Щепкин атындагы тарыхы эки кылымдан ашык убакытты чапчыган айтылуу жогорку театралдык окуу жайын кыргыз студенттери бүтүрүп келишти. Бул тарыхый окуу жайдан аяктаган бешинчи агым болду. Тилеке каршы 2000-жылы бүтүргөн төртүнчү агымдан соң окуу жай менен келишим үзүлүп калган. Ортодо 20 жылдай кыргыз таланттары Щепкинден билим ала алышкан эмес.
Бирок маданият, улуттук искусство дегенде ичкен ашын жерге койгон таланттуу кино жана театр актеру, режиссер, педагог Алайбек Тойчубековдун жылдарга созулган аракети, КРдин бийлиги, Маданият министрлигинин колдоосу менен келишим кайра жанданып 2021-жылы атайын республикалык деңгээлде кастинг өтүп, 25 бала тандалып алынып Щепкиндин кыргыз студиясынын бешинчи агымы окуусун баштаган. Стдуенттердин бийик искусство жайынан терең билим алышын камсыздаш үчүн оңой эмес каражат керек болгон. Атайын токтомдун негизинде кыргыз өкмөтү балдарга атайын стипендия төлөп берсе Россотрудничество 25 баланын окууга кетчү чыгымын төрт жыл бою көтөрүп келген.
Бул студиядан билим алган студенттердин өзгөчөлүктөрүнүн бири алар Россиянын жүрөгүндө туруп алып, өз эне тилинде окушкан. Болгондо да адабий эне тилди өркүндөтүү максатында, коюлган чыгармаларда адабий, кооз кыргыз тилининин болушу окуу долбоорунун негизги талаптарынын бири болгон. Жыйынтыгында 22 студент окуу жайды аяктап, дүйнөлүк классикадан тарта, заманбап чыгармаларга чейин эне тилде сүйлөтүп бир нече спектаклдерди чыгарышкан.
Мындай билимден соң кыргыз студиясынын бешинчи агымынын бүтүрүүчүлөрү алты кызыл дипломго ээ болуп, тарых жаратышты.