БИШКЕК, 29-апр. — Sputnik. Москва Киевдин Жеңиштин 80 жылдыгы майрамдалып жаткан маалдагы элдешүүгө макул же каршы экенин түшүнө алган жок. Бул тууралуу РФ президентинин маалымат катчысы Дмитрий Песков айтканын РИА Новости жазды.
"Президент Владимир Путин кечээ Жеңиштин урматына элдешүү жарыяланарын билдирди. Киевдин жообун ушу кезге чейин уга элекпиз. Ага макул же каршы экенин түшүнүү азырынча кыйын", — деген ал журналисттерге.
Песков Киев режиминин мындай кадамын манипуляция деп атап, Владимир Зеленскийдин ок атууну 30 күнгө токтотуу сунушуна пикирин билдирди.
"Бул жерде президент Путин айткан нерселер абдан маанилүү. Эч кандай жооп албай туруп, мындай узакка созулган элдешүүгө баруу татаал", — деди маалымат катчы.
Анын айтымында, Киев түз сүйлөшүүлөр боюнча сунушка да жооп бере элек. Анткен менен Москва эки тарап акыры эпке келет деген жыйынтыкка ыктайт, ошентсе да Зеленскийдин легитимдүүлүгүнө байланышкан юридикалык мүнөздөгү маселелер ачык бойдон калууда.
Кечээ Россия президенти Улуу Жеңиштин 80 жылдыгына карата элдешүү жарыялады. Ок атуу 8-майда токтоп, элдешүү 11-майга чейин уланмакчы.