БИШКЕК, 26-апр.— Sputnik. Улуттук коопсуздук мамлекеттик комитети башында казакстандыктар турган, Бишкекте иштеп жаткан колл-борбордун 43 кызматкери кармалганын билдирди.
Маалыматта кызматкерлер биологиялык кошулмалар менен тиричилик техникасын сатып, ишенимге кирген кардарларга лоторея билетин сатып алууну сунушташканы айтылат.
© Фото / пресс-служба ГКНБ КР
“Лотореядан утуп алуу үчүн башка эсептерге кардар акча которушу керек болгон. Колл-борбор лоторея ойнотууга салык органдарынан каттоодон өтпөгөн жана лицензиясы жок. Колдонулган серверлер менен маалымат базалары Казакстанда жайгашкан”, — деп билдирди УКМК.
Атайын кызмат колл-борбор киреше табуу үчүн манипуляция ыкмаларын колдонгонун, алдангандардын көбү улгайган адамдар экенин кошумчалады.
Жыйынтыгында 43 кызматкер кармалып (арасында төрт өспүрүм бар), 78 ноутбук, 43 телефон алынган. Тергөө уланууда.