БИШКЕК, 5-апр. — Sputnik. Россиядан чыккан хоккейчи Александр Овечкин НХЛ (Хоккей боюнча улуттук лига) тарыхындагы голдор боюнча Уэйн Гретцкинин рекордун кайталады. Бул тууралуу РИА Новости кабарлады.
Анын "Вашингтон Кэпиталз" командасы өз талаасында "Чикаго Блэкхоксту" 5:3 менен жеңди. Булардын экөөнү Овечкин киргизип, жалпы 1 486 оюнда киргизген шайбалары 894кө жетти. Бул канадалык Уэйн Гретцки орноткон рекорд болчу. Эми аны Овечкин кайталады. Ал 894 шайбаны 1 487 оюнда киргизген. 39 жаштагы Овечкин дагы деле ойноп жаткандыктан рекордду жаңылай алмакчы.
"Бул — хоккей үчүн, бүтүндөй Вашингтон, күйөрмандар үчүн чоң сыймык. Азыр деле ишене албай жатам", — деди Овечкин.
Ошондой эле Овечкин бул ийгиликке жетүүдө мурдагы жана учурдагы командалаштарынын салымын белгиледи.
"Никлас Бэкстрем, Сергей Федоров, Виктор Козлов жана башкалар... Бул жигиттер болбосо мындай ийгиликке жетмек эмесмин", — деди ал.