Майор Иван Гришин
Ал 1918-жылы 21-июлда Васильевка кыштагында (азыркы Аламүдүн району) дыйкандын үй-бүлөсүндө туулган. Алты класстык билим алып, андан соң колхоздо иштей баштайт.
1938-жылы Кызыл Армиянын катарына чакырылат. 1942-жылы кенже лейтенанттардын курсун аяктайт да, Улуу Ата Мекендик согушка аттанат. 1944-жылы 20-августта II даражадагы Ата Мекендик согуш ордени менен сыйланат. Кавказдагы салгылашка, Польшаны бошотууга, Германиядагы согушка катышкан. 1945-жылы 25-февралда кыргызстандык жоокер Кызыл Туу ордени менен сыйланган.
1945-жылы апрелде капитан Иван Гришин 1-Беларусь фронтунда 8-гвардиялык армиянын 39-гвардиялык аткычтар дивизиясынын 112-гвардиялык аткычтар полкунун пулеметтук ротасынын командири болгон. Берлинди алууда каармандыгы менен айырмаланган. 1945-жылы 23-апрелде Шпре дарыясынан кечип, ротасы менен батыш жээктеги плацдармды басып алып, советтик калган күчтөрдүн суудан өтүшүнө шарт түзүп берген. Салгылашта Гришин душмандын бир нече аскери менен офицерин жок кылган.
1945-жылы 31-майда СССРдин Жогорку Советинин президиумунун жарлыгы менен капитан Иван Гришин Советтер Союзунун Баатыры наамына татып, Ленин ордени жана Алтын Жылдыз медалы тапшырылган.
Согуштан кийин Советтик Армияда кызмат кылуусун уланткан. 1948-жылы офицердик курамдын кесипкөйлүгүн өркүндөтүү боюнча курстан өткөн. 1954-жылы "Выстрел" курсун аяктап, 1960-жылы майор чини менен запаска бошотулган.
1985-жылы 11-мартта СССРдин Жогорку Советинин президиумунун жарлыгынын негизинде I даражадагы Ата Мекендик согуш ордени менен, андан сырткары, Каармандыгы үчүн, Согуштагы эрдиги үчүн, Германиянын жеңгендиги үчүн медалдары менен сыйланган.
Иван Гришин Бишкек шаарында 2006-жылдын 13-декабрында көз жумган.
Материал ачык маалыматтардын, КР Куралдуу күчтөрүнүн жана "Герои страны" сайтындагы материалдардын негизинде жазылды.