БИШКЕК, 31-мар. — Sputnik. Кыргызстандын президенти Садыр Жапаров Кожентте Тажикстандын президенти Эмомали Рахмон менен сүйлөшүүлөрдү өткөрдү. Бул тууралуу мамлекет башчынын маалымат кызматынан кабарлашты.
Тараптар эки жактуу кызматташууну талкуулашкан. Жетишилген макулдашуулар кыргыз-тажик мамилелеринин жаңы этабын белгилеп, туруктуу тынчтык, экономикалык өнүгүү жана эки элдин ортосундагы ынак коңшулукту чыңдоо үчүн бекем пайдубал түзөрүнө ишеним билдиришти. Мындан тышкары, президенттер CASA-1000 долбоорунун алкагында эки өлкөнүн энергетикалык системаларын бириктире турган "Датка — Согд" электр линиясын ишке киргизди.
Долбоор Кыргызстан менен Тажикстандан Афганстан жана Пакистанга электр энергиясын экспорттоого багытталган. Кыргызстан электр энергиясын жайында, ашыкча өндүрө баштаганда сатат.