"Учкун" мамлекеттик басмаканасы 2024-жылы 1,7 миллиард сом киреше тапты. Бул тууралуу Азамат Кыязов Sputnik Кыргызстан радиосуна маек куруп жатып билдирди.
Анын айтымында, өткөн жылы мекеме мамлекеттин бюджетине 278,2 миллион сом салык төлөдү.
"Учкун" ачык акционердик коому акыркы үч жылда техникалык базасын чыңдап, инфратүзүмдү жакшыртуу боюнча иштерди жасады. 2023-жылы китеп басуу үчүн атайын жабдуу сатып алууга президенттин фондунан 176 миллион сом бөлүнгөн. Паспортторду, акциздик маркаларды жана окуу китептерин чыгаруу үчүн заманбап басма орнотмолору сатып алынды. Мекеме 2024-жылы 1,7 миллиард сом киреше тапты. Мындан ары адистердин квалификациясын жогорулатуу, жогорку сапаттуу продукция өндүрүү ишине басым жасалат," — деди Кыязов.
Ал ошондой эле басмаканада жумушчу орундарынын саны 166дан 313кө көтөрүлүп, ишкананын өндүрүштүк көлөмү жогорулаганын кошумчалады.