БИШКЕК, 25-мар. — Sputnik. Чолпон-Ата, Кант, Балыкчы шаарларында таштанды сорттогон завод курулат. Бул тууралуу жаратылыш ресурстары, экология жана техникалык көзөмөл министри Медер Машиев Sputnik Кыргызстан агенттигинин маалымат борборунда билдирди.
Анын айтымында, былтыр министрлик Россия-Кыргыз өнүктүрүү фонду, Евразия өнүктүрүү банкы жана "Таза Альянс" компаниясы менен үч шаарда таштандыны сорттоо заводун куруу боюнча төрт тараптуу келишимге кол койгон.
Жаратылыш ресурстары, экология жана техникалык көзөмөл министри Медер Машиев
© Sputnik / Жантай Макенов
"Булар Чолпон-Ата, Кант, Балыкчы шаарларында болот. Азыр биринчи кадамдар башталып, таштандыны сорттоо боюнча долбоор иштелип жатат. Ал ишке киргенден кийин айланасындагы майда полигондорду камтып кетет", — деди министр.
