Лейтенант Николай Рудь
Кыргызстандан чыккан Советтер Союзунун Баатыры Николай Рудь
© Фото / Герои страны
Ал 1922-жылы 19-декабрда Иман шаарында (азыркы Дальнереченск калаасы, Приморье аймагы) туулган. 1940-жылы мектепти аяктап, Фрунзе шаарындагы аэроклубга келип кирет. Кыргызстандан Жумушчу-дыйкандардын Кызыл армиясына чакырылат. 1942-жылы Чкалов атындагы аскердик авиация училищесинен бомбалоочу учкуч болуп чыгат. 1942-жылдын июнунан тарта Улу Ата Мекендик согушка кирет. 1944-жылдын күзүндө лейтенант Николай Рудь Беларусь фронтунда 16-аба армиясынын 6-аралаш авиакорпусунун 221-бомбалоочу авиадивизиясынын 745-бомбалоочу авиаполкунун учкучу болгон.
Согушка кирген жылдары ал 200 ирет учуп, душмандын топтолгон жерлерине чабуул жасап, согуштук техникаларын талкалап, зыянга учураткан. Аны төрт жолу атып түшүрүшкөн.
1944-жылдын 26-октябрында СССРдин Жогорку Советинин жарлыгы менен "согуштагы эрдиги, каармандыгы үчүн" Николай Рудь Советтер Союзунун Баатыры наамына татып, Ленин ордени жана Алтын Жылдыз медалы менен сыйланган. Булардан сырткары, Кызыл Туу, Кызыл Жылдыз, Ата Мекендик согуштун II даражасы ордендеринин, бир нече медалдын ээси.
Согуш аяктаган соң советтик-япондук согушка катышкан. Тынчтык орногондон кийин Советтик Армияда кызматын уланткан. 1953-жылы январда капитан Рудь запаска бошотулган. Москвада жашап жүрүп, 1978-жылы 16-октябрда Ваганьково көрүстөнүнө коюлган.
Материал ачык маалыматтардын, КР Куралдуу күчтөрүнүн жана "Герои страны" сайтындагы материалдардын негизинде жазылды.