БИШКЕК, 24-мар. — Sputnik. Былтыр коррупция жана кызматтык кылмыштар боюнча козголгон иштердин алкагында прокуратура органдары мамлекетке 312,1 миллион сом кайтарышты. Бул тууралуу Sputnik радиосуна берген маегинде Башкы прокуратуранын коррупцияга каршы күрөшүү башкармалыгынын жетекчиси Жаныбек Досмамбетов билдирди.
Анын айтымында, келтирилген зыяндын жалпы суммасы 4 миллиард 238 миллион сомду түзгөн.
"Өткөн жылы прокуратура кызматтык жана коррупциялык кылмыштар боюнча 556 иш козгоду. Тергөө учурунда 119 миллион 625 миң сом акчалай, 192 миллион 476,7 миң сом мүлк түрүндө мамлекетке кайтарылды. Мындан тышкары, укук бузуулар боюнча прокурордук актылардын негизинде мамлекетке 22 миллиард 375 миллион сом кайтарылган", — деди Досмамбетов.
