БИШКЕК, 23-мар. — Sputnik. 25-мартта Бишкекте Кыргызстан менен Катардын футболдук беттеши өтөт. Бул тууралуу Дене тарбия жана спорт мамлекеттик агенттиги маалымдады.
Билдирмеге караганда, оюн Дөлөн Өмүрзаков атындагы стадиондо болуп, саат 19:45те башталат. Ага чейин орозо кармагандар үчүн ооз ачуу уюштурулары кошумчаланды.
"Бул күнү күйөрмандар оюнга гана күбө болбостон, чыныгы кыргыз маданиятынын атмосферасын сезе алышат. Намаз окугандар үчүн намаз окуучу жай да уюштурулат", — деп жазылат кабарда.
25-мартта улуттук курама команда 2026-жылкы дүйнө чемпионатына тандоо оюндарынын үчүнчү раундунун алкагында Азиянын учурдагы чемпиону Катар менен ойнойт. Үчүнчү раунддун алкагында 20-мартта Кыргызстан Өзбекстан менен беттешип, 1:0 менен утулуп калган.
Үчүнчү баскычта 18 курама алты командадан турган үч тайпага бөлүнөт. Бул этаптагы оюндардын жыйынтыгы боюнча ар бир тайпадан эң мыкты эки команда 2026-жылкы дүйнөлүк биринчиликке жолдомо алышат. Төртүнчү квалификациялык раундда Азиядан дагы эки катышуучу аныкталып, континенттер аралык плей-офф аркылуу Дүйнөлүк чемпионатка катышуу үчүн дагы бир орун үчүн беттешет. "Ак шумкарлар" Иран, Катар, БАЭ, Түндүк Корея жана Өзбекстандын курама командалары менен А тайпасында жайгашкан.
