БИШКЕК, 20-мар. — Sputnik. Кийинки жуманын башы жаан-чачындуу болуп, күн сууктайт. Бул тууралуу Кыргызгидрометтен маалымдашты.
"Аномалдуу жылуу жана кургак аба ырайынан кийин 24-26-март аралыгында аба ырайынын кескин өзгөрүлүшү күтүлөт. Көпчүлүк аймактарда жаан, тоолуу райондордо кар жаашы ыктымал. Күн күркүрөп, абанын температурасы төмөндөйт. Тоолуу райондордо жолдор тоңуп, тайгак болот", — деп жазылган маалыматта.
Батыштан соккон шамалдын ылдамдыгы айрым жерлерде секундасына 15-20 метрге чейин жетет.
Мындай аба ырайы автожолдордун абалын начарлатып, энергетика жана коммуналдык кызматтардын ишин, жайыттарда мал кармоону кыйындатары белгиленген.
