БИШКЕК, 19-мар. — Sputnik. Камчыбек Ташиев Кыргызстан — Тажикстан — Өзбекстан чек араларынын кесилишкен чекити макулдашылган жерди картадан көрсөттү.
Анын айтымында, бул боюнча сүйлөшүүлөр 2007-жылдан бери жүрүп, кыргыз-тажик чек арасы такталгандан кийин Душанбе шаарында үч тарап бир чечимге келген.
"Кесилиш чекити аныкталганы менен кыргыз-тажик чек арасынан 1300 метр, кыргыз-өзбек чек арасынан 690 метр, тажик-өзбек чек арасынан 3 миң метр кесилиш чекитине чейинки жерлер такталган эмес. Буга байланыштуу тараптар бул тилкелерди кесилиш чекити боюнча келишимге киргизүүнү макулдаштык", — деди УКМК төрагасы.
Ташиев картадан кесилишүү чекити кайда жайгашканын көрсөттү.
"Кыргызстан менен Тажикстан башка жерлерди сунуштаган. Анда биздин жолдун башка өлкөгө өтүп кетүү коркунучу бар болчу. Ошондуктан ага макул болбой, болжол менен 1000 гектар жер Кыргызстанга калды. Бул да биздин жеңишибиз", — деди Ташиев.
Ал ошондой эле 31-мартта Кожентте үч мамлекеттин президенттери чек аралардын кесилишкен чекити боюнча документке кол коерун эске салды. Ал белгилегендей, документ андан кийин Жогорку Кеңештин кароосуна киргизилип, ратификациядан өтөт.