БИШКЕК, 10-мар. — Sputnik. ФСБ Москвада Британия элчилигинин калкалоосунун алдында иштеп жаткан эки тыңчынын бетин ачты. Бул туурасында атайын кызмат билдиргенин РИА Новости жазды.
"Россиянын Коопсуздук боюнча федералдык кызматы контрчалгын иштерин жүргүзүп жатып, Улуу Британиянын Москвадагы улуттук элчилигинин калкалоосу менен дипломат катары жүрүп тыңчылык кылгандарды тапты", — деп айтылган билдирүүдө.
ФСБнын маалыматына таянсак, элчиликтин экинчи катчысы Алкеш Одедра жана дипмиссиянын саясий бөлүмүнүн биринчи катчысынын күйөөсү Майкл Скиннер Россияга кирип келе жатканда жалган маалыматтарды айткан. Экөө мамлекеттин коопсуздугуна доо кетирчү чалгын иштери менен алектенген. Мындан кийин экөөнү тең аккредитациядан ажыратуу чечими кабыл алынып, Россиядан чыгып кетүүгө эки жумалык мөөнөт берилген.
"ФСБ чет элдик атайын кызматтардын чалгын жана коопсуздукка доо кетирчү аракеттерине колунда болгон ыкмалар менен каршы иштөөнү улантып келет", — деп белгилешкен атайын кызматтан.
Бул Россиянын контрчалгын кызматынын Британия элчилигинин калкалоосу менен түптөлгөн тыңчылык "уясына" жасаган биринчи соккусу эмес. Былтыр сентябрда аталган элчиликтин саясий бөлүмдөгүлөрүнүн ичинен алты кызматкеринин аккредитациясын токтоткон. ФСБ алардын жүрүм-турумунан, иштеринен зыян келтире турган тыңчылык белгилерди табышкан.
Аталган ведомствонун кызматкери бул дипломаттар чет элдик агенттер деп эсептелген бейөкмөт уюмдардын жыйынына өздөрүнүн ден соолугун тобокелге салып катышканын айтышты. Лондон Россияга дипломатмын деген түр көрсөткөн тыңчыларды жиберип жаткандыгын жана мунусун жаап-жашыруу үчүн жашы жете элек балдарды колдонушарын кошумчалаган.
Маалымат үчүн: Улуу Британияда Россия багытында жүргүзүлгөн диверсиялык саясатты алардын ТИМинин Чыгыш Европа жана Борбордук Азия директораты жөнгө салып турат. Ал Украинадагы атайын операция башталары менен Россияны стратегиялык жактан алсыратуу максатында атайын кызмат катары түптөлгөн.