БИШКЕК, 4-мар. — Sputnik. АКШнын Украинага аскердик жардамын токтотуу ыктымалдыгы Киевди тынчтык орнотуу процессин баштоого түртүшү мүмкүн. Бул тууралу Россия президентинин маалымат катчысы Дмитрий Песков билдиргенин РИА Новости жазды.
"Эгер бул чындык болсо, чечим чындап эле Киев режимин тынчтыкка келүүгө түртүшү мүмкүн", — деди Кремлдин өкүлү.
Песков, мындан тышкары, төмөнкүлөргө токтолду:
Москва Дональд Трамптын Украинага тынчтык орнотуу ниетин колдойт;
АКШ тараптан Украинага аскердик жардамдын токтотулушу тынчтык орнотууга чоң салым болот;
Киев жардамдын басымдуу бөлүгүн АКШдан алып келген;
Трамп президенттигинин биринчи мөөнөтүндө антироссиялык санкцияларды киргизип, Украинага курал-жарак жөнөткөнү Москванын эсинде;
Владимир Путин менен Александр Лукашенко жолуккан сайын Украинаны талкуулашат, Москва абалды жөнгө салуу боюнча бардык аракеттерди колдоого алат;
Кремль санкциялардын айрымдары алынары тууралуу АКШдан расмий маалымат ала элек;
Москва менен Вашингтондун мамилеси санкция менен коштолгон терс маанайынан арылышы керек.
Бүгүн АКШ Украинага аскердик жардамын токтоткону белгилүү болду. Ак үйдүн маалыматы боюнча, Америка колдоону Киев тынчтыкка бет алганын далилдемейинче токтото турмай болгон.
Эскерте кетсек, өткөн жумада Ак үйгө сейрек кездешүүчү металлдар боюнча макулдашууга кол коюу үчүн барган Зеленский Трамп менен айтыша кеткен. АКШ президенти Зеленскийди ок атууну, РФ лидери Владимир Путинге сын жаадыра берүүнү токтотууга чакырган. Киев режиминин жетекчиси Россияны күнөөлөп, актанып, аягында АКШга доомат кое баштаганда вице-президент Жей Ди Вэнс аны демократтардын нысапсыз үгүтчүсү деп атаган. Натыйжада Киев делегациясын Ак үйдөн чыгарып салышкан да, сапар максатына жетпей калган.
Жолугушуудан кийин Трамп Зеленский тынчтыкка даяр эместигин жана АКШны сыйлабастыгын көрсөткөнүн айтты.
Президенттин улуттук коопсуздук боюнча кеңешчиси Майкл Уолтц кийинчерээк Трамп Зеленский менен сүйлөшүүнү жандантууга даяр экенин, бул үчүн ал позициясын өзгөртүп, кечирим сурап, кен байлык боюнча келишимге кол коюуга даярдыгын жана тынчтык орнотуу боюнча сүйлөшүүлөргө катышуу ниетин билдириши керек экенин билдирген.