БИШКЕК, 3-мар. — Sputnik. УКМКнын төрагасы жана министрлер кабинетинин төрагасынын орун басары Камчыбек Ташиев 12 жылдык окуу системасына каршы экенин айтты.
Ал мындай пикирге жүргүзүлгөн тийиштүү аналитиканын негизинде келгенин айтты. Ташиевдин кебинин урунттуу учурлары:
бизде мектептеги билим берүү начарлап кетти. Ушул түйшүктү чечмейинче башка системага умтулуунун кереги жок;
бул системаны жактагандар "чет мамлекетке барып окууга ыңгайлуу болот" дешүүдө. Бирок статистиканы алып карай турган болсок, балдардын 3-5 пайызы гана Европага, Америкага барып окуйт экен. Калгандары КМШ менен өз өлкөбүздө эле жогорку билим алууну улантышат;
финансылык, экономикалык жактан да өтө көп зыянга учурап калабыз. 30 миңден ашык кошумча мугалим, 200дүн тегерегинде кошумча мектеп керек болот;
биз алдыңкы мектептерди жоюп, чабал мектептерге теңеп салдык, бул да чоң көйгөй болду.
Ташиев, мындан тышкары, окуу жайлардагы коррупцияны дагы жоюу зарылдыгын белгилеген.
"Билим берүү жаатында өтө чоң кооптуу абалга бара жатабыз. Анткени окуу жайлар байлык топтоо системасына айланды. Окууга барбай эле диплом алгандар көбөйдү. Университеттен 200 эмес, таза эмгеги менен 20 гана студент диплом алса ошол алда канча мамлекет үчүн пайдалуу", — деди Ташиев.
Ал ошондой эле ар бир окуу жайды текшерүүгө да жетишишерин кошумчалады.
19 Баш оона 2024, 14:49