Мамлекеттик цирк Маданият, маалымат жана жаштар саясаты министрлигинин карамагынан чыгарылды. Тиешелүү токтомго министрлер кабинетинин төрагасы Адылбек Касымалиев кол койгон. Маалыматка ылайык, Абубакир Изибаев атындагы цирк мамлекеттик ишкана катары кайра түзүлүп, Мамлекеттик мүлктү башкаруу боюнча агенттиктин карамагына өткөрүлөт. Мекеме толугу менен өзүн-өзү каржылоого өтүп, уставы жаңыланары айтылды. Токтом расмий жарыялангандан 10 күндөн кийин күчүнө кирет.
2023-жылы Сузак районунда бир жыл ичинде эрте никеге турган жана жаш кыздардын эрте кош бойлуу болуп калган 68 учуру катталган. Бул тууралуу Акыйкатчынын орун басары Айчүрөк Назаралиева билдирди. Анын айтымында, айрым аймактарда кыздарды окутуу эмес, эрте турмушка берүү максаты көбүрөөк байкалат. "Былтыр жети дубанды кыдырдык. Анда эрте күйөөгө тийүү, эрте кош бойлуулук абдан көбөйгөндүгүн жергиликтүү бийлик өкүлдөрү, укук коргоо органдары айтышты. Саламаттык сактоо министрлигинин маалыматына караганда, Жалал-Абад облусунун Сузак районунда 2023-жылы бир жылдын ичинде эле жашы жете электердин никеге турушу жана эрте кош бойлуулук боюнча 68 учур катталыптыр. Мониторингде жаш кыздардын көбү башынан эле эрте күйөөгө тийгенге даярданышары байкалды. Ошондуктан агартуу иштерин жакшы жүргүзүү керек," — деди Назаралиева. Ал ата-эне баласы билим алып, психологиялык абалы турукташканга чейин колдоо көрсөтүшү керектигин кошумчалады.
"Ала-Тоо" породасындагы койлорго патент алууга укук берилди. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти. Маалыматка ылайык, чечим бул породаны сынаган комиссиянын ишинин жыйынтыгы менен кабыл алынган. "Кыргыз мал чарба жана жайыттар илим-изилдөө институтунун илимий-техникалык кеңеши "Ала-Тоо" породасындагы койлорду сыноо боюнча комиссиянын жыйынтыгын карап, ага укуктук статус берүүгө макулдук берди. Эми эт-май багытындагы "Ала-Тоо" породасындагы кыргыз койлоруна патент алууга болот", — деп жазылган маалыматта. Эт-май багытындагы "Ала-Тоо" породасы жергиликтүү кыргыз койлоруна гиссар кочкорлорун аргындаштыруу жолу менен алынган.
АКШ президенти Дональд Трамп Украинадагы маани-маңызы жок согушка "миллиарддарды, миллиарддаган доллар" жумшоо ниети жоктугун айтты. Бул туурасында РИА Новости жазды. "Украинадагы мааниси жок согушка премьер-министр же башкалар сыяктуу миллиарддаган долларды төлөгүм келбейт", — деди Трамп аталган өкмөт башчы Стармер менен биргеликте берген маалымат жыйын учурунда. Ал жолугушуу учурунда Украинанын НАТОго кирбей турганын да айтты. "Ишке ашпай турганы нерсе", — деген ал журналисттин бул жааттагы суроосуна жообун узатып жатып. Мындан сырткары, Украинадагы согуш отунун токтошу алардын тынчтыкка жасаган кезектеги кадамы экендигин белгилеген. Трамп киев режиминин жетекчиси Владимир Зеленский менен мамилеси илгертен эле жакшы экенин, болгону акыркы учурда сууй түшкөнүн белгилеген. Ал эми аны "диктатор" деп атаганы тууралуу суроого "ошентип айттымбы, ишене албай турам" деп жооп берген.