БИШКЕК, 17-фев. — Sputnik. АКШ Россия жана Украина менен өз-өзүнчө жолугушуп, андан соң эки тараптын катышуусунда биргелешкен сүйлөшүүлөрдү жүргүзүү ниетинде. Бул туурасында РИА Новости америкалык NBC телеканалына таянып жазды.
"Америкалык эки аткаминер Кошмо Штаттар Россия, андан соң Украина менен эки тараптуу жолугушуу өткөрүп, булардан кийин гана биргелешкен сүйлөшүүлөрдү уюштуруу боюнча пландар бардыгын айтып берди", — деп кабарлаган телеканал.
Өткөн аптанын шаршемби күнү, тагыраагы, 12-февралда, РФ жана АКШ президенттери Владимир Путин менен Дональд Трамптын телефондон 1,5 сааттай сүйлөшкөнү маалым болгон.
РФ лидеринин маалымат катчысы Дмитрий Песков президенттер Россия, АКШ жарандарын алмашуу жана Украинадагы кырдаалды жөнгө салуу боюнча кеп болгонун айткан. Ал Вашингтон Украинадагы абалды жайгаруу боюнча бетме-бет сүйлөшө турган тарап экендигин кошумчалаган.
Трамп көп өтпөй россиялык кесиптеши менен Сауд Арабиясында жолугарын белгилеп, бирок убактысын тактаган эмес. Ал эми жекшемби күнү Путин менен "өтө жакынкы күндөрү" жолугушу мүмкүндүгүн жана Украинадагы чатакты "тез арада" чечем деген ниетте экенин жар салган.