Быйыл мунайды кайра иштетүүчү "Жунда" заводуна 167 миллион доллардын тегерегинде инвестиция салынарын министрлер кабинетинин биринчи орун басары Данияр Амангелдиев Sputnik маалымат борборунда өткөн брифингде билдирди. Анын айтымында, каражат заводду модернизациялоого жана К5 классындагы бензиндин стандарттарына ылайыкташтырууга жумшалат."Модернизациялоо иштерин 2025-жылдын аягына чейин бүтүрүү мерчемделип жатат. Инвесторду колдоого багытталган конкреттүү жол картасы түзүлдү. Абдан жакшы жеңилдиктерди бердик, нефтини кайра иштетүүгө акциздик салыктан да бошоттук. Мунун баары мунайды кайра иштетүүдөгү потенциалды арттыруу мүмкүнчүлүгүн кеңейтет", — деди Амангелдиев. Ал бийлик мунай казуу көлөмүн жогорулатуу боюнча тапшырма коюп жатканын белгиледи. Амангелдиевдин айтымында, 2027-жылы Жалал-Абаддагы нефтини кайра иштетүүчү завод жаңыланып бүтөт.
Койдун жүнүнөн жасалган жер семирткичтин натыйжалуулугу изилденүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти. Маалыматка ылайык, сыноону Кыргыз дыйканчылык илим-изилдөө институту менен Айыл чарба өсүмдүктөрүн жана багбанчылыкты экспертизалоо департаменти жүргүзүүдө. "Сокулуктагы кант кызылчасы боюнча тажрыйбалык төрт гектар жерге кой жүнүнөн жасалган жер семирткичтин төрт түрү күздүк буудайга жана күздүк арпага гектарына 600 килограмм, 500 килограмм жана 400 килограмм себилди. Натыйжа сугат мезгилинде алынат. Көчөттөр пайда болгондон баштап түшүм жыйноого чейин фенологиялык байкоолор жүргүзүлөт. Бул жер семирткичтин өсүмдүктөргө тийгизген таасирин талдоого мүмкүндүк берет", — деп жазылган маалыматта. Алгачкы жыйынтык октябрдын аягында жүгөрү бышканда чыгарылат.
Кара-Суу районундагы 9-класстын окуучусу ур-токмоктон каза болгон. Бул тууралуу Ош ШИИБден билдиришти. Маалыматка ылайык, 12-февралда Кара-Суу райондук ички иштер бөлүмүнө Каратай айылындагы мектептин алдында 9-классынын окуучусу жыгылып, каза болгону кабарланган. "Териштирүү учурунда №39 орто мектептин окуучулары өз ара пикир келишпестиктен улам уруша кетип, натыйжада 9-класстын окуучусу ур-токмоко кабылып, эсин жоготуп кулап калгандыгы маалым болгон", — деп айтылат маалыматта. Кылмыш иши козголуп, шектүү катары 18 жаштагы өспүрүм кармалып, убактылуу кармоочу жайга киргизилген. Бул — жыл башынан бери окуучунун ур-токмоктон каза болгон үчүнчү учуру.
"Жеңиш 9/45" мекенчил долбоорунун алкагында автожүрүштөр, фестиваль, жаштар үчүн тарыхый агартуучу иш-чаралар өтүп, ал Улуу Ата Мекендик согуштагы элдердин эрдигине болгон урмат-сыйды кайтарып келүү максатын көздөйт. Бул туурасында Мамдуманын вице-спикери Борис Чернышов айтып бергенин РИА Новости жазды. Аталган долбоордун уюштуруу комитетинин жетекчиси Чернышов Батышка ыктап грант менен жашаган жана Брюссель, Вашингтондогу кожоюндарынын каалоосун аткарган саясатчылардын доору аяктап бара жатканын белгиледи.9-майга байланышкан бул долбоорду "Евразия" автономиялык бейөкмөт уюму уюштурууда. Чернышов иш-чарага башка мамлекеттер да чакырылганын, бардыгы үчүн эшик ачык экендигин айтты. Бул долбоорго Кыргызстан да кошулары кабарланды.