БИШКЕК, 5-фев. — Sputnik. Швециянын Эребру шаарындагы Campus Risbergska мектебинде ок атылып, 10 киши каза болгонун РИА Новости кабарлады.
Каргаша 4-февраль күнү күндүз, чоңдор окуп жатканда болгон. Expressen гезити өз маалымат булагына таянып ок чыгарган кылмышкер өмүрүн кыйганын жазды.
Ушу тапта полиция кырсыктан көз жумгандардын аты-жөнүн тактап жатат, жабыр тарткандардын так саны азырынча белгисиз. Буга чейин беш киши жарадар болгону айтылган.
Окуя болгон жерде куткаруучулар менен тез жардам кызматкерлери иштеп жатат. Тургундарга үйдөн чыкпай туруу сунушталды.
Швециянын премьер-министри Ульф Кристерссон маалымат жыйында окуяны өлкө тарыхындагы эң апааттуу каргаша деп атады.
Өлкөнүн королу Карл XVI Густав да жабыр тарткандарга көңүл айтып, полицияга, куткаруу кызматына жана дарыгерлерге ыраазычылык билдирген.
