БИШКЕК, 1-фев. — Sputnik. Кыргызстандыктар Мамлекеттик Кремль сарайында өтө турган “Романсиада жылдыздары” аттуу концертке катыша турганын Россотрудничество билдирди.
Иш-чара быйыл 12-ирет өтмөкчү. Анда элге музыкалык-мультимедиалык спектакль тартууланат.
Уюштуруучулардын айтымында, орус романсынын классикасы Третьяков галереясынын жана Орус музейинин коллекциясындагы живопистин шедеврлери менен айкалышат. “Өлбөс музыка” менен живопись бири-бирин толуктап, аларды эң мыкты романс аткаруучулары жандантышмакчы.
Концертке Кыргызстан, Казакстан, Беларусь, Болгария, Польша, Эквадор, Кытай, Түштүк Корея, Өзбекстан, Франция, Азербайжан жана Түндүк Македония өлкөлөрүнүн артисттери катышат.