Өзгөн жана Ысык-Ата райондорунда өзгөчө пилоттук долбоор башталды. Бул тууралуу министрлер кабинетинин төрагасы Адылбек Касымалиев аталган аймактарда 25 унаанын ачкычын тапшыруу аземинде билдирди. Маалыматка ылайык, аталган унаалар айыл өкмөттөргө өткөрүп берилет. Касымалиев белгилегендей, административдик-аймактык реформанын алкагында республикада 231 айыл аймагы, 33 шаар, анын ичинде эки республикалык маанидеги жана 14 облустук маанидеги шаарлар түзүлдү. "Реформанын биринчи этабынан кийин бирдиктүү региондук программанын негизинде мамлекеттик органдардын райондук деңгээлдеги бөлүмдөрүнүн жана жергиликтүү мамлекеттик администрациялардын ишинин натыйжалуулугун жогорулатуу зарылдыгы келип чыкты. Ушуга байланыштуу Өзгөн жана Ысык-Ата райондорунда дагы бир өзгөчө пилоттук долбоор башталды. Анда министрликтердин жана ведомстволордун бөлүмдөрүн, өкүлчүлүктөрү райондук деңгээлде акимдин убактылуу жетектөөсүнө өткөрүп берилет", — деди ал. Касымалиев аймактардагы шаарларды өнүктүрүүгө бир топ каражат бөлүнүп жатканын кошумчалады.
Транспорт каражатын онлайн кайра каттоо кызматы ишке кирет. Министрлер кабинетинин тиешелүү токтому кабыл алынды. Жаңы кызмат аркылуу жарандар транспорт каражаттарын жана аларга карата менчик укуктарын онлайн кайра каттай алышат. Бул үчүн Электрондук кызмат көрсөтүүлөрдүн мамлекеттик порталы, "Түндүк" мобилдик тиркемеси же башка санариптик инструменттер колдонулат. Кызматты пайдалануу үчүн жарандар Face ID бетти таануу технологиясы аркылуу идентификациядан өтүшү керек.
Бишкек мэриясы автобустарда накталай төлөмдү 40 сомго чейин көбөйтүү боюнча долбоорду коомдук талкууга чыгарды. Бул тууралуу Транспорт жана жол-транспорт инфраструктурасын өнүктүрүү департаментинин директору Уланбек Бейшенбаев билдирди. Муну шаар бийлиги жүргүнчүлөрдү карта менен төлөөгө көндүрүү максатында жасоодо. Учурда накталай эмес төлөм 17 сом, ал эми накталай 20 сомду түзөт. "Накталай эмес төлөм 17 сом, накталай 20 сом болгондуктан, жүргүнчүлөр үч сомго карабай жол кирени акча менен эле төлөп жатышат. Накталай төлөмдү 40 сомго чейин көбөйтүү боюнча долбоорду коомдук талкууга койдук. Жөнгө салуу таасирин талдоо аяктагандан кийин биз долбоорду Бишкек шаардык кеңешинин кароосуна киргизебиз", — деген Бейшенбаев. Буга чейин Бишкек мэриясы жүргүнчүлөрдү жол кирени карта менен төлөөгө көндүрүү үчүн накталай төлөмдү 40 сомго чыгарууну сунуштаган.
"Отель Евразия" ЖЧКсына таандык 20 гектардан ашуун жер тилке мамлекетке кайтарылды. Бул тууралуу УКМКдан билдиришти. Маалыматка ылайык, анын базар баасы 729 миллион 682 миң сомду түзөт. "Ысык-Көл облусунун Кара-Ой айылында жайгашкан "Бермет" мамлекеттик пансионатынын жер тилкелери мыйзамсыз менчиктештирилген", — деп айтылат маалыматта. Жүргүзүлгөн иш-чаралардын жыйынтыгында жер тилкелер Мамлекеттик мүлктү башкаруу боюнча мамлекеттик агенттиктин балансына өткөрүп берилгени кошумчаланды.
Республикада сутка ичинде 11 өрт кырсыгы катталып, өрттү өчүрүүгө 12 бөлүм тартылган. Өзгөчө кырдаалдар министрлигинен билдиришкендей, Чүй облусу менен Бишкек шаарында 4төн, Баткен, Жалал-Абад, Талас облустарында 1ден өрт катталды. Куткаруу кызматтары тарабынан 4 чыгуу болгон.