Жалал-Абад шаары Түрк мамлекеттер уюмунун туристтик борбору статусуна ээ болду. Бул тууралуу Туризмди өнүктүрүү фондунан билдиришти. Маалыматка ылайык, мурда бул статус Казакстандын Түркстан шаарына таандык болгон. "Символикалык ачкычты өткөрүп берүү аземи Түркстан шаарында өтүп, анда Жалал-Абад шаарынын мэринин биринчи орун басары Кубанычбек Иманалиев, Кыргызстандын Экономика жана коммерция министрлигинин жашыл экономика жана туризм секторунун башчысы Алибек Матиев жана Түркстан шаарынын акими Азимбек Пазылбекулы катышты. Жалал-Абадга бул статустун ыйгарылышы аймактын туристтик потенциалын күчөтүп, жаңы мүмкүнчүлүктөрдү ачууга өбөлгө түзөт", — деп айтылат маалыматта. Иш-чарада эки шаардын ортосундагы достук жана өнөктөштүк мамилелерди чыңдоо жолдору да талкууланды.
Жогорку Кеңештин вице-спикери Нурбек Сыдыгалиев Бишкектин райондорунун аталышын жана Эски аянттагы Владимир Лениндин эстелигин алмаштырууну сунуштады. Анын айтымында, Эски аянтка Турдакун Усубалиевдин эстелигин орнотуу зарыл. "Бишкектин Эски аянтына 2020-жылы Турдакун Усубалиевдин аты ыйгарылган. Ошол жерде Лениндин эстелиги турат. Анын ордуна Усубалиевдин эстелигин коюш керек. Анын Кыргызстандын өнүгүшүнө кошкон салымын баарыбыз жакшы билебиз. Мындан тышкары, Бишкектеги төрт райондун аттарын өзгөртүү боюнча дайыма айтып келем. Өлкөдөгү бардык аталыштарды бир өзгөртүү боюнча мыйзам даярдоого тапшырма берсеңиздер. Баарын бир кабыл алып коелу", — деди эл өкүлү. Ал мындай сунушту буга чейин берип, натыйжа болбой келгенин кошумчалады.
Республикалык компетенция борбору мектеп ашпозчуларынын билимин жогорулатат. Бул тууралуу Тамак-аш боюнча инженер-технолог Мунара Азисова билдирди.Анын айтымында, Республикалык компетенция борборунда мектеп ашпозчулары жана ашкана кызматкерлери меню түзүүгө, калорияларды эсептөөгө жана жаңы технологиялар менен тамак даярдоого окутулат. "Мектеп ашпозчуларынын маянасы аз. Ал жакка билимдүү ашпозчулар иштебейт. Ошондуктан мектептер тамак-ашты жакшы жасаган, бирок билими жок кызматкерлерди алууга мажбур болуп жатат. Мектеп ашпозчулары биздин борборго келип кыска мөөнөттүү курстардан үйрөнүшөт. Борбордо ашпозчулардын каалагандай билим алуусуна шарттар түзүлгөн. Жумушуна, бошогон убактысына карап, айтор, өзүнө ылайыктуу учурда билим ала алат", — деди Азисова. Ал ошондой эле курстун алдында ашпозчуларга тестирлөө жүргүзүлүп, анын негизинде окутуу программалары аныкталарын кошумчалады.
Бишкектин Чүй проспекти менен Шопоков көчөсүнүн кесилишине жер алдынан өтүүчү өтмөк жана унаа токтотуучу жай курулат. Бул тууралуу мэриядан билдиришти. Маалыматка ылайык, курулуш быйыл мартта башталып, жер өтмөк Байтик баатыр көчөсүнө чейин болмокчу.2 миллиард сомго бааланган долбоорду экс-мэр Нариман Түлеевдин "Ташболот Холдинг" компаниясы каржылай турган болду. Мэрия жерди аларга 49 жылга ижарага берген. "Курулуш иштери 1,5-2 жылга созулат. Ошол учурда жана объект ишке кирсе кошумча жумуш орундары түзүлө