БИШКЕК, 6-янв. — Sputnik. Канаданын премьер-министри жана башкаруучу Либералдык партиясынын лидери Жастин Трюдо партиянын жаңы жетекчиси шайлангандан кийин өкмөт башчылыктан кетерин билдирди. Бул тууралуу РИА Новости жазды.
"Менин карьерамдагы бардык ийгиликтерим үй-бүлөмдүн колдоосу менен болду. Кечээ кечки тамакта бул чечимди балдарыма айттым, бүгүн болсо сиздер менен бөлүшүүдөмүн. Либералдык партиянын жаңы лидери шайлангандан кийин премьер-министрликтен кетүүнү чечтим”, — деген Трюдо.
Ал бул процесс жыйынтыкталганга чейин өз милдеттерин аткарып турарын белгиледи.
Буга чейин ЖМКларда Либералдык партиянын 50дөн ашык депутаты премьер-министр Жастин Трюдо кызматтан кетиши керек деген пикирге келгенин кабарлашкан. Ошондой эле Канаданын Жаңы демократиялык партиясынын лидери Жагмит Сингх Трюдону кызматтан кетүүгө чакырып, алдыдагы жыйындарда ага ишеним көрсөтпөө маселесин көтөрүп чыгарын жарыялаган.