БИШКЕК, 26-дек. — Sputnik. Жогорку Кеңештин депутаттары фамилия алууда кеңири тандоо укугун берүүнү сунуштап жатат. Тиешелүү мыйзам долбоорун Мирлан Самыйкожо менен Нурлан Шакиев демилгелеп, биринчи окууда колдоо тапты.
Демилгечилер азыркы иштеп жаткан мыйзамдарда фамилия алуу үчүн чектелген сандагы варианттар бар экенин айтышууда. Мындан тышкары, кыргыз тилиндеги "тегин" деген сөз кеңири тарабаганы айтылып, анын мааниси башкача дагы болгону белгиленди.
"Кыргыз тилиндеги "тегин" деген сөз кеңири белгилүү боло алган жок, себеби бул сөздүн мааниси кандайдыр бир нерсени же кимдир бирөөнү тануу дегенди түшүндүрөт. Элибиздеги "тегин жерден сөз болбойт" деген макалды кыргыз тилинен орус тилине которгондо "На пустом месте не возникает разговор" дегенди түшүндүрөт, ал эми "теги" деген сөз адам кайсы урууга таандык экенин көрсөтүп турат", — деп белгилешти демилгечилер.
Мыйзам долбоорунда фамилияларды жана атасынын аттарын жазуунун төмөнкү варианттарын кошуу сунушталган:
чоң атасынын аты боюнча жазылганда чоң атасынын атына мүчө уланбастан ата-энесинин каалоосу менен атасынын атынан кийин эркек жынысындагы балдар үчүн "уулу" деген сөз жана аял жынысындагы балдар үчүн "кызы" деген сөз жазылат. Мисалы Бакытбек Үсөн же Бакытбек Үсөн Жакшылык уулу (кааласа);
чоң атасынын атына "теги" деген сөз ажыратылбай чогуу жазылганда, ата-энесинин каалоосу менен атасынын атынан кийин эркек жынысындагы балдар үчүн "уулу" деген сөз жана аял жынысындагы балдар үчүн "кызы" деген сөз жазылат. Бакытбектеги Үсөн же Бакытбектеги Үсөн Жакшылык уулу (кааласа);
чоң атасынын атына "теги" деген сөз ажыратылбай чогуу жазылганда, ата-энесинин каалоосу менен эркек жынысындагы балдар үчүн илик жөндөмөсүнүн мүчөсү (дын/тын, дин/тин, дүн/түн ж.б.) жана аял жынысындагы балдар үчүн чыгыш жөндөмөсүнүн мүчөсү (дан/тан, ден/тен, дөн/төн ж.б.) атасынын атына уланып чогуу жазылат. Бакытбектеги Үсөн же Бакытбектеги Үсөн Жакшылыктын (кааласа).
"Мыйзам долбоорунун демилгечилеринин бири катары айткым келет, жаңы жылдан тарта мен Нурлан Тургунбекович Шакиев эмес, Нурлан Тургунбек уулу болом", — деди спикер.