БИШКЕК, 26-дек. — Sputnik. Кыргызстанга жарым жылдык мөөнөткө кант ташып келүүгө (импорттоого) убактылуу тыюу салуу каралууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, чектөө Азык-түлүк коопсуздугу жана тамак-аш кеңешинин сунушу менен дыйкандарды колдоо максатында киргизилүүдө.
"Чечим 13-декабрда Азык-түлүк коопсуздугу жана тамак-аш кеңешинин отурумунда өлкөнүн азык-түлүк коопсуздугун камсыздоо, анын ичинде айрым айыл чарба азыктарын импорттоого/экспорттоого тыюу салуу маселелерин талкуулаган жыйында кабыл алынган", — деп айтылган маалыматта.
Белгилей кетсек, быйыл кант кызылчасынын жалпы дүң түшүмү 870,2 миң тоннаны түзүп, өткөн жылдын ушул мезгилине салыштырмалуу 249,2 миң тоннага көп болду. Аталган көрсөткүч 120 миң тонна кант өндүрүүгө мүмкүндүк берип, өлкөнүн ички керектөөсүн толук камсыз кылганы кошумчаланган.
