Жогорку Кеңеште дин чөйрөсүндөгү мыйзам долбоорлору экинчи жана үчүнчү окууда жактырылды. Аталган документтер диний чөйрөнү иретке келтирүү максатын көздөйт. Ага ылайык,коомдук жайларда жана мамлекеттик органдарда адамдын өздүгүн тааныганга мүмкүндүк бербеген кийимдерди кийүүгө, мечиттерде саясий мүнөздөгү чогулуштарды өткөрүүгө, диний адабият, аудио жана видеоматериалдарды коомдук жайларда, мамлекеттик жана муниципалдык уюмдарда, бала бакчаларда, мектептерде, ошондой эле турак жайларды кыдырып таратууга тыюу салынат. Эреже бузган жеке жактарга 20 миң сом, юридикалык жактарга 60-65 миң сом айып салуу каралган.
Евразиялык экономикалык кеңештин ишмердүүлүгү региондогу мамлекеттердин экономикасынын өсүүсүн камсыздап, сооданын кеңейишине жана кооперациялык байланыштардын тереңдөөсүнө өбөлгө болууда. Бул тууралуу Россия президенти Владимир Путин Жогорку Евразиялык экономикалык кеңештин тар курамдагы жыйынында айтты. ЕАЭБ лидерлеринин катышуусундагы иш-чара Россиянын Ленинград облусундагы "Игора" курорттук комплексинде өтүп жатат. "Эң башкысы, интеграциялык кызматташуу ар бир мүчө мамлекетке пайда алып келүүдө, беш өлкөнүн, ошондой эле жалпы евразиялык региондун экономикасынын өсүүсүн камсыздап жатат. Жашоо шарт жакшырууда", — деди Путин.
Базарларда ден соолукка олуттуу зыян алып келүүчү оюнчуктар кездешүүдө. Бул тууралуу Ооруларды алдын алуу жана мамлекеттик санитардык-эпидемиологиялык көзөмөл департаментинен билдиришти. Маалыматка ылайык, жыл сайын базарлардан 200дөй оюнчуктун үлгүсү алынып, экспертиза жүргүзүлөт. "Соңку төрт жылда 1 323 үлгү алынып, 3 503 оюнчук текшерилген. Анын ичинен пластизолдон жасалган 50 үлгүдөн фенол, стирол жана формальдегид сыяктуу уулуу заттардын нормадан 2-10 эсе жогору экени аныкталган. Жыйынтыктар көрсөткөндөй, көбүнчө 3 жаштагы балдарга ылайыкталган Кытайдан чыккан оюнчуктар нормага туура келбейт," — деп айтылат маалыматта. Адистер бул химиялык заттар аллергия кылып, нерв системасына зыянын тийгизип, ал тургай ракка чейин жеткирерин белгилешкен.
Улуу Ата Мекендик согуштун ардагери Амантур Токтоназаров 98 жашында дүйнө салды. Ал 1926-жылы Жети-Өгүз районунун Ак-Кочкор айылында туулган. "Литванын Каунас шаарын жана Польшаны фашисттик баскынчылардан бошотууга катышкан. Жеңишти Германияда тосуп, эрдиктери үчүн Кызыл Жылдыз ордени, Берлинди алгандыгы үчүн медалы менен сыйланган. Согуш бүткөндөн кийин мекенине кайтып айыл чарба тармагында эмгектенген", — деп айтылат маалыматта. Ардагер 2017-жылы Москва шаарында болуп, Улуу Жеңиштин 72 жылдыгына арналган салтанатка катышкан. Ошондой эле өзү туулуп-өскөн айылындагы кичи футболдук аянтчага ысымы ыйгарылган.///ЭМИ ВАЛЮТА КУРСУ МЕНЕН ТААНЫШЫП АЛЫНЫЗДАР: Улуттук банктын билдирүүсү боюнча ушул тапта: 1 АКШ доллары 87 сомго евро 90 сом 59 тыйынга рубль 87 тыйынгаКазак тенгеси 17 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 63 сом 40 тыйындан баштап, 64 сом 40 тыйынга чейин, Аи 95 үлгүсүндөгү күйүүчү май 72 сом 40 тыйындан 73 сом 40 тыйынга чейин, дизель майы 71 сом 30 тыйындан, 72 сом 30 тыйынга дейре, ал эми унаа газынын литри 36 сомдон сатылууда АБА ЫРАЙЫ 27-декабрга караган түнү жаан-чачын күтүлбөйт. Батыштан соккон шамалдын ылдамдыгы секундасына 4-9 метрге жетет. 27-декабрь бейшембиде республика аймагында күн ачык болот. Мындай маалыматты Кыргызгидромет таратты. Абанын температурасы Чүйдө +3...+8, Талас аймагында +2...+7, Ош, Жалал-Абад жана Баткен облустарында +5...+10, Ысык-Көлдө +2...+7 градус жылуу болот. Ал эми Нарын аймагында суук көбүрөөк сезилип, термометр -1...-6 градусту көрсөтөт. Бишкекте +6...+8, Ош шаарында +8...+10 градус жылуу болот.