БИШКЕК, 20-дек. — Sputnik. Мектепке кирүү үчүн орус тилин билүүнүн деңгээлин текшере турган тест мамлекеттик же муниципалдык билим берүү уюмдарында акысыз өткөрүлөт. Бул тууралуу РИА Новости Россиянын Билим берүү министрлигине шилтеме берип жазды.
Эске салсак, Россиянын президенти Владимир Путин жылды жыйынтыктаган маалымат жыйынында орус тилин билбеген мигранттардын балдарын мектепке алууга тыюу салган мыйзамга комментарий берген.
"Мамдума орус тилин билбеген мигранттардын балдарын мектепке албоого укук берген мыйзам кабыл алды. Жалпы жонунан бул түшүнүктүү эле нерсе. Тил билбеген балага билим берүү мүмкүн эмес да. Балага алгач орус тилин үйрөтүү керек, буга кетчү чыгымды ким төлөйт?" — деди Путин.
Анын айтымында, эмгек мигранттарынын санын азайтуу үчүн квалификациясы жок жумушчуларга болгон талапты кыскарта турган технологияларды колдонуу керек.
"Эгерде муктаждык болсо биздин айрым өнөктөштөрүбүз менен биргеликте, биринчи кезекте, Борбор Азия өлкөлөрүндө адамдарды буга даярдашыбыз керек. Ал үчүн орус мектептердин тармагын, орус тилин өнүктүрүп, Россиянын мыйзамдарын түшүндүрүү кажет", — деди Путин.
РФ лидери мунун бардыгы өтө аяр жана курч маселе экенин белгиледи.