Жогорку Кеңеш социалдык тармак аркылуу бирөөгө жалаа жапкандарга айып салуу боюнча мыйзам долбоорун үчүнчү окууда жактырды. Ага ылайык, эми интернетте бирөө-жарымды мазактап, жалаа жапканы үчүн жеке жактарга 20 миң сом, юридикалык тараптарга 65 миң сом айып салынат. Парламентте буга 68 депутат "макул" болсо, төртөө "каршы" добуш берген. Мыйзам долбоору президент кол койгондон кийин күчүнө кирет. Буга чейин министрлер кабинети жеке жактарды 100 миң сомго, юридикалык жактарды 200 миң сомго айыпка жыгууну сунуштаган эле.
Мамлекет уюштурган кампаларда сатылган көмүрдүн сапаты стандартка толук жооп берет. Бул тууралуу “Кыргызкөмүр” ишканасынын башкы директорунун орун басары Күлчоро Молдалиев Чүй облусуна журналисттерге уюштурулган пресс-турдун алкагында билдирди.Анын айтымында, быйыл “Кыргызкөмүр” мамлекеттик ишканасы жарандарды арзан жана сапаттуу көмүр менен камсыз кылуу максатында республиканын аймагында жалпы 75 көмүр кампасын уюштурду. Бүгүнкү күндө Бишкек шаарынын аймагында 13, Чүй облусунда 14 кампа иштеп жатат. “Кыргызкөмүр” менен биргеликте ачылган көмүр кампаларында Бишкек шаарынын аймагында көмүрдүн баасы 5 миң сомдон, 5 миң 300 сомго чейин, ал эми Чүй облусунун аймактарында 5 миң сомдон, 5 миң 800 сомго чейин сатылууда. Сапаты жагынан стандартка толук жооп берет”, - деди ал. Ошондой эле бүгүнкү күнгө карата республиканын аймагында быйылкы күз-кыш мезгилине карата 120 миң тонна көмүр сатылган бул өткөн жылдын ушул мезгилине салыштырмалуу 2,5 эсеге көп.
Президенттин администрациясында грек-рим күрөшү, эркин күрөш жана бокс боюнча жаштар арасындагы дүйнө чемпионаттарында ийгиликке жетишкен спортчуларды жана алардын машыктыруучуларын сыйлоо аземи өттү. Бул тууралуу өкмөттүн маалымат кызматы кабарлады. Сыйлыктарды президенттин атынан министрлер кабинетинин төрагасынын орун басары Эдил Байсалов тапшырган. Жогорку спорттук жетишкендиктери үчүн спортчуларга жана алардын насаатчыларына бир жолку акчалай сыйлыктар ыйгарылган. "Бул жетишкендиктер өсүп келе жаткан муун үчүн маанилүү үлгү болуп, жаңы спорттук жеңиштерге жол ачат. Өлкө жетекчилиги спорттун өнүгүшүнө ар дайым колдоо көрсөтүп, спортчуларыбыздын эл аралык аренадагы ийгилигине көмөктөшөт”,-деди Эдил Байсалов. Салтанат Албаниянын Тирана шаарында өткөн грек-рим жана эркин күрөш боюнча жаштар арасында дүйнө биринчилигинин жана Черногориянын Будва шаарында болгон бокс боюнча жаштар арасындагы дүйнөлүк биринчилигине байланыштуу өткөн.
USAID агенттигинин Россиядагы ишмердүүлүгүнө тыюу салуу чечими туура болгонун Азербайжандын президенти Илхам Алиев ВГТРК менен РИА Новостиге курган маегинде билдирди. "Жозеф Байдендин администрациясы көп нерсеси менен эсте калат. Айрыкча, таңуулаганды жакшы көрүшөт. Алар "биз силерге жардам беребиз" дешет, "рахмат, кереги жок" деп баш тартсаң", "жок, жардам беришибиз керек" деп таңуулашат. Мисалы, алардын USAID деген структурасы эмнегедир биздин муктаждык жок жерлерге жардам бергиси эле келип турат", — деди Алиев. Октябрдын башында азербайжандык депутаттар Тышкы иштер министрлигинин башчысына USAID уюмунун өлкөдөгү ишин токтотуу, ошондой эле Баку менен Вашингтондун ортосундагы кызматташтыкты кайра карап чыгуу сунушу менен кайрылышкан.