БИШКЕК, 17-дек. — Sputnik. "Кыргызфильм" киностудиясынан "Бир туугандык жеңиш" аттуу көркөм фильмдин синопсисине сынак жарыяланганын кабарлашты.
Анын башкы каарманы — Олимпиада оюндарынын күмүш байгесинин ээси, мушкер Мунарбек Сейитбек уулу. Фильмдин узактыгы 90 мүнөттү түзүп, долбоор Кыргызстан, Түркия жана Өзбекстандын биргелешкен кинопродукциясы болот.
Сынакка катышуу үчүн синопсистерди 2024-жылдын 16-декабрынан 2025-жылдын 30-январына чейин тапшыруу керек. Жеңүүчүнү жогорудагы үч өлкөнүн өкүлдөрү кирген комиссия аныктайт.
Эске салсак, мушкер Сейитбек уулунун жеке машыктыруучусу Парижде өткөн XXXIII жайкы Олимпиадага баруу үчүн аккредитациядан өтпөй калган. Мындан улам ага өзбекстандык Акмаль Хасанов секундант болгон. Натыйжада кыргыз спортчусу финалга чейин жетип, күмүш медалга татыган.
