БИШКЕК, 16-дек. — Sputnik. Турак жай алуу үчүн кезекте 40 миңден ашуун киши турганын президент Садыр Жапаров Бишкекте ипотекалык батирлердин ачкысын ээлерине тапшырып жатып билдирди.
Мамлекет башчы учурда Кыргызстан боюнча жалпы 40 миңден ашык батирдин курулушу жүрүп жатканын кошумчалады.
"Келип түшкөн арыздардын негизинде азыркы тапта республика боюнча турак жай алуу кезегине 40 миңден ашуун жаран катталган. Элестетип көрүңүздөр, 40 миң киши – дээрлик бир райондун же бир шаардын калкы!" — деди өлкө башчы.
Ошондой эле ал турак жай көйгөйүн чечүү үчүн көрүлгөн аракеттерди тизмектеп, мамлекет бөлгөн каражаттын эсебинен жалпы 549 батир ээлерине тапшырылып жатканын белгиледи.
1 / 6
Турак жай алуу үчүн кезекте 40 миңден ашуун киши турганын президент Садыр Жапаров Бишкекте ипотекалык батирлердин ачкысын ээлерине тапшырып жатып билдирди
© Sputnik / Аяна Байтемирова
"Батирлер Мамлекеттик ипотекалык компания аркылуу кезекте турган социалдык багыттагы кызматкерлерге жана ошондой эле курулушка 50 пайыз үлүш кошуу шарты менен кирген мигранттарыбызга жана башка жарандарыбызга берилип жатат. Буга чейин да түшүндүрмө бердим эле, азыр да айтып коеюн, 50 пайыз өлчөмүндөгү алдын ала төлөмдөр кезекте турган кийинки жарандарга турак жай курууну тездетүүгө бир топ эле салым болот. Ошондуктан кезекте турган бардык жарандарыбыз мурдагыдай он жылдап кезекте турбай жакын арада батирлүү болосуздар", — деди Жапаров.
Президент сөзүнүн аягында эки күндөн кийин мурдагы №47 колониянын ордуна курулуп жаткан турак жай комплексиндеги батирлер дагы тапшырыларын айтты. Ошондой эле Жапаров МИК алдыдагы 4-5 жылда кезекте турган үй-бүлөлөрдү үй менен толук камсыз кылуу максатын көздөп жатканын кошумчалады.
