БИШКЕК, 16-дек. — Sputnik. Бишкекте КамАЗ коляска менен жолдон өтүп бараткан аялды өлтүрө сүздү.
Милициянын Кайгуул кызматы кырсык бүгүн кечке маал Шабдан баатыр көчөсүндө болгонун кабарлады.
Анда оор жүк ташуучу автоунаанын 62 жаштагы айдоочусу жөө адамдар өтчү чийинден коляска түртүп өтүп бараткан 29 жаштагы келинди сүзгөн. Аял кырсык болгон жерде мүрт кетип, коляскадагы баласы ооруканага жаткырылган.
Факт маалымат журналына катталып, тергөөгө чейинки текшерүү иштери башталды. Бардык керектүү экспертизалар дайындалып, унаа айып короого киргизилди.