БИШКЕК, 13-дек. – Sputnik. ЕАЭБде чекене товар жүгүртүү 2024-жылдын үч кварталында дээрлик сегиз пайызга өстү. Бул тууралуу Россиянын премьер-министри Михаил Мишустин Евразия өкмөттөр аралык кеңешинин жыйынында билдирди.
Анын айтымында, ИДП менен өнөр жай өндүрүшү 4,5 пайызга, жүргүнчүлөрдү ташуу дээрлик 7,5 пайызга өстү. Өкмөт башчы ЕАЭБде электрондук коммерция рыногу, тагыраагы, маркетплейстер дагы популярдуу болуп жатканын белгиледи.
“Буга чейин беш мамлекеттин башчылары Бажы кодексине декларациялоо процесстерин жана онлайн платформаларда сатып алынган товарларды биримдиктин чек арасы аркылуу өткөрүү жол-жоболорун кыйла жөнөкөйлөтүүчү өзгөртүүлөрдү жактырышкан. Биз өнөктөштөрүбүздү тиешелүү протоколду тез арада ратификациялоого чакырабыз”, - деди Мишустин.
Ал ЕАЭБ өлкөлөрү аракеттерди координациялоо менен биримдиктин технологиялык суверенитетин өнүктүрүүдө мындан да чоң натыйжаларга жетише аларын белгилеп, өнөр жайдагы биргелешкен долбоорлорду субсидиялоо механизми тууралуу бизнеске маалымат берүүгө чакырды.
“Биз биргелешкен долбоорлорду союздук бюджеттен субсидиялоонун улуттар аралык механизмин ишке киргиздик, ал азыртан эле иштей баштады. Компаниялар реалдуу жардам ала аларына ишениши үчүн аларга маалымат берүү зарыл”, - деди РФ өкмөт башчысы.
Ал ошондой эле ЕАЭБ мамлекеттерин көмүртекти азайтуу боюнча Биримдик ичиндеги диалогду түзүүгө чакырды.