БИШКЕК, 13-дек. — Sputnik. Кыргызстандын демилгеси менен 23-октябрь — Ак илбирстин эл аралык күнү деп белгиленди. Мындай чечимди БУУнун Башкы ассамблеясы кабыл алган.
Демилгени президент Садыр Жапаров көтөргөнүн мамлекет башчынын маалымат катчысы Аскат Алагөзов эске салды.
"Бул тарыхый окуя Кыргызстандын Борбор Азиядагы уникалдуу табиятты сактоо аракеттеринин дүйнөлүк деңгээлдеги маанисин көрсөтөт. Мындан ары ак илбирс бийик тоолуу экосистеманын символу катары эл аралык күнгө ээ болду", — деп жазган Алагөзов.
Эске салсак, Кыргызстан БУУнун Башкы ассамблеясына "Ак илбирстин эл аралык күнүн жарыялоо жөнүндө" резолюция киргизген. Ал эми былтыр президент "Ак илбирсти Кыргыз Республикасынын улуттук символу деп таануу жөнүндө" жарлыкка кол койгон.
