Жогорку Кеңештин депутаты жок адамдардын салык төлөгөнү тууралуу айткан маселе боюнча эки мекеме аралык жумушчу топ түзүлдү. Бул тууралуу Санариптик өнүктүрүү министрлигинен билдиришти. Кечээ, 11-декабрда, депутат Акбөкөн Таштанбеков санариптик өнүктүрүү министри Нурия Кутнаевага суроо узаткан. "10 жыл мурда өлгөн 200дөй адам кантип кабинет ачып салык төлөп жатат? Мындай болушу мүмкүн эмес. Мындан тышкары, сиздин кол алдыңыздагыларга 200 документ боюнча тапшырык жибергем. Сиздер экөө боюнча маалымат берип, калгандарын бербей жатасыздар. Ал аз келгенсип укук коргоо органдарын адаштырып, документтерди жок кылып жатасыздар. Эмнеге үч айдан бери маалымат бербей жатасыздар?" — деген эл өкүлү. Маалыматка ылайык, жумушчу топтор салык жана архив маселелери боюнча түзүлүп, ага укук коргоо органдарынан дагы өкүлдөр кирген. Ошондой эле анда депутат комплекстүү жана олуттуу маселени көтөргөнү белгиленген.
Кара-Суудагы "Тураталы" базарынын мыйзамсыз менчиктештирилген жери мамлекетке кайтарылды. Бул тууралуу Башкы прокуратурадан билдиришти. Маалыматка ылайык, жалпы 4,93 гектар жер тилкеси мыйзамсыз сатылып кеткени аныкталган. "Прокуратура сотко кайрылып, доо арыз канааттандырылды. Анын негизинде райондук прокуратура Мамлекеттик мүлктү башкаруу боюнча агенттигине кайрылып, жыйынтыгы менен базар баасы 890 миллион 985 миң 950 сомго бааланган жер тилкеси мамлекетке кайтарылды", — деп айтылат маалыматта.
Мурдагы чоң аткаминер коррупцияга шектелип кармалды. Бул тууралуу УКМКдан билдиришти. Маалыматка ылайык, шектүү мурда ӨКМди жетектеп, парламенттин экс-депутаты жана Жалал-Абаддын губернатору болгон. "Ал 1995-1996-жылдары Балыкчыдагы эт комбинатынын кыймылсыз мүлкүн менчикке мыйзамсыз чыгарып кетүүгө шектелүүдө. Учурда ал мүлктүн баасы 626 миллион сом экени айтылды", — деп жазылат кабарда. Алдын ала маалыматтар боюнча, кеп Султан Урманаев тууралуу болуп жатат.
Россия Көз карандысыз мамлекеттердин шериктештигине мүчө өлкөлөр менен экономикалык жана гуманитардык алаканы бекемдөөгө кызыкдар. Бул тууралуу Россиянын премьер-министри Михаил Мишустин билдиргенин РИА Новости жазды. Москвада КМШ премьерлер Кеңешинин кезектеги жыйыны өтүп, ага россиялык өкмөт башчы төрагалык кылган. "Биз салтка айланган экономикалык жана гуманитардык байланышты чыңдоого кызыкдарбыз. Россиянын тышкы соодасынын 16 пайызы Шериктеш өлкөлөргө туура келет. Ал эми жалпы соода үстүбүздөгү жылдын үч кварталында 11 пайызга өстү", — деген Мишустин жыйын учурунда. ///ЭМИ ВАЛЮТА КУРСУ МЕНЕН ТААНЫШЫП АЛЫНЫЗДАР: Улуттук банктын билдирүүсү боюнча ушул тапта: 1 АКШ доллары 86 сом 80 тыйынга евро 91 сом 19 тыйынга рубль 85 тыйынга Казак тенгеси 17 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 66 сом 90 тыйындан баштап, 67 сом 40 тыйынга чейин, Аи 95 үлгүсүндөгү күйүүчү май 74 сом 40 тыйындан 75 сом 40 тыйынга чейин, дизель майы 74 сом 80 тыйындан, 75 сом 30 тыйынга дейре, ал эми унаа газынын литри 37 сомдон сатылууда АБА ЫРАЙЫ 13-декабрга караган түнү жаан-чачын күтүлбөйт. Батыштан соккон шамалдын ылдамдыгы секундасына 4-9 метрге жетет. Жума күнү республика боюнча күн ачык болот. Мындай маалыматты Кыргызгидромет таратты. Абанын температурасы Чүйдө +4...+9, Талас аймагында +2...+7, Ош, Жалал-Абад Баткен жана Ысык-Көл облустарында -1...+4 градус болот. Ал эми Нарын аймагында суук көбүрөөк сезилип, термометр -3...-8 градусту көрсөтөт. Күндүн табы борбор калаада +6…+8, Ош шаарында +1...+3 градус жылуу болот.