БИШКЕК, 11-дек. — Sputnik. ЕАЭБдеги электрондук соода боюнча келишимдин долбоору макулдашылды. Бул тууралуу Евразия экономикалык комиссиясынын соода министри Андрей Слепнев билдирди.
Анын айтымында, келишимдин негизги максаты – электрондук соодадагы тоскоолдуктарды азайтуу.
Келишимдин урунттуу учурлары:
ЕАЭБ өлкөлөрү сатуучуларга же маркетплейстерге Биримдиктин келишиминде каралбаган тарифтик, тарифтик эмес же башка чектөөлөрдү киргизбейт. Ал эми маркетплейстер ЕАЭБ өлкөлөрүнүн сатуучуларын жана сатып алуучуларын басмырлабашы керек;
коомдук офертаны даярдоонун, товарларды жана акчаны кайтарып берүүнүн жалпы эрежелери киргизилүүдө. Бул товарды кайсы өлкөдөн сатып алганына карабастан кепилденген тейлөө ала турган керектөөчү үчүн да, бизнес процесстерин бирдиктүү платформада стандартташтыра алган сатуучулар/маркетплейстер үчүн да пайдалуу болот;
келишимде интернеттен товар сатып алган жарандардын укуктарын алар жайгашкан өлкөнүн мыйзамдарына ылайык коргоону ишке ашыруу каралууда;
ЕАЭБде товарларды кайтаруунун бирдиктүү стандарты болот (14 күндүн ичинде).
Негизги принциптерди макулдашкандан кийин ЕЭК документтин долбоорун мамлекет ичинде бекитүү жана кол коюу үчүн зарыл болгон расмий жол-жоболорго өтөт.