БИШКЕК, 9-дек. — Sputnik. Россияны эч ким сындыра албайт, себеби чындык да, дем-кайрат да, кубаттуу курал да бизде. Бул сөздөрдү РФ лидери Владимир Путин Россиянын баатырларына Кызыл жылдыз орденин тапшырып жатканда айтты.
"Жоокерлердин чечкиндүүлүгү биздин жеңе турганыбыздан шек санатпайт, Россияны эч ким сындыра албайт. Чындык да, дем-кайрат да, күчтүү курал да биз тарапта", — деди Путин.
Бул иш-чара Россиядагы Мекендин баатырлары күнүндө өтүп жатат.
"Бул күнү мамлекет жана анын келечеги үчүн болуп көрбөгөндөй эрдиктерди жасаган мекендештерибизге таазим этебиз. Өздөрүнүн эмгеги, иши, каармандыгы, эрдиги менен Россияга жана элине күжүрмөн кызмат кылуунун үлгүсүн көрсөтүштү. Биз ар кыл мезгилде, доордо мамлекетибиздин көз карандысыздыгын коргогондордун баарын даңктайбыз", — деп айткан РФ лидери.
Кремлдеги салтанатка өзгөчө эрдик жана кайраттуулугун көрсөткөн 300гө чукул жай жарандар менен аскер кызматкерлери чакырылган. Алардын арасында Советтер Союзунун, РФтин баатырлары, Даңк орденинин кавалерлери бар.