БИШКЕК, 6-дек. — Sputnik. АКШ президентинин улуттук коопсуздук боюнча кеңешчиси Жейк Салливан бейшембиде Владимир Зеленскийдин кеңсесинин жетекчиси Андрей Ермак менен жолукканда Киевге жүз миңдеген снаряд, сооттолгон техника жөнөтүүгө убада кылды. Бул туурасында РИА Новости жазды.
Кезектеги көмөк 2025-жылдын январында берилери айтылды.
Буга чейин РФ ТИМинин өкүлү Мария Захарова мамлекет башчы Жозеф Байдендин администрациясы президенттик шайлоодо жеңген Дональд Трамп кызматка отурганга чейин Украинага жардамдын калган бөлүгүн шашылыш берүүгө аракет кылып жаткандыгын айткан. Бул 2025-жылы согушту улантууну камсыздоо үчүн жасалганын белгилеген.
"Жейк Салливан бейшемби күнү Андрей Ермак менен жолукканда январды ортолоп Киевге кошумча жүз миңдеген снаряд, сооттолгон техника жөнөтүүгө убада кылды", — деп айтылган маалыматта.
АКШ Украинаны аскер жактан колдоп турууга убада кылган, тагыраагы, өлкө аймагынан сырткары жерлерде жаңы жоокерлерди машыктырып, согушууга үйрөтүүгө сөз бергени кабарланды.
Басылмадагы маалыматка ылайык, Украинага тоңдурулган россиялык активдерден карала турган 20 миллиард доллар көлөмүндөгү насыя "бекитилип, чечилген". Guardian АКШ муну бул жакынкы апталарда киргизиле турган жаңы чектөөлөргө байланыштырып жаткандыгын жазды. Ал кадам Россиянын кармашты улантуудагы мүмкүнчүлүктөрүн азайтууну жана Украинанын сүйлөшүүдөгү позицияларын күчөтүүнү көздөйт.
Россия Украинага Батыштын курал-жарак берүүсү кырдаалды жөнгө салбастыгын жана НАТО өлкөлөрүн чатакка катыштырып, "от менен ойноо" болуп жатканын айтып келет. РФ ТИМинин жетекчиси Сергей Лавров Украинага делген жүктүн бардык түрү Россия үчүн мыйзамдуу бутага айланарын эскерткен. Анын айтымында, АКШ менен НАТО согушка курал-жарак берип эле катышпастан, Улуу Британиянын, Германиянын, Италиянын жана башка өлкөлөрдүн аймактарында аскердик кадрларды даярдап берип да көмөктөшүүдө.
Кремль Батыштын Киевди курал-жарак менен жабдуусу орус-украин сүйлөшүүлөрүн улам артка тартып, натыйжасы кесепеттүү болорун да бир нече ирет белгилеген.
Россиянын Украинада атайын операциясы башталгандан тарта ЕБ менен G7 мамлекеттери РФтин 300 миллиард еврого чукул валюта резервдеринин жарымына жакынын тоңдурган. 260 миллиард евро Европа биримдигинин аймагында. Алар негизинен дүйнөдөгү эң ири бельгиялык Euroclear эсептик-клиринг системасынын эсебинде жатат.