БИШКЕК, 5-дек. — Sputnik. Германия Украинага алыска атылуучу куралдарды Россиянын аймагына колдонууга уруксат кылууга ниеттенбейт жана канаттуу Taurus ракеталарын берүү планы жок. Бул туурасында өлкөнүн канцлери Олаф Шольц Киевдеги сапарынан кийин Бундестагда сүйлөп жатканда айтканын РИА Новости жазды.
"Мен кырдаалдын татаалданып, НАТО менен Россиянын ортосунда согуш чыгып кетпеши үчүн мурдагыдай эле бардыгын жасайм... Андыктан чечимим туура деген пикирдемин: биз жөнөткөн куралдар менен Россиянын түпкүрүнө сокку урууга уруксат бербейбиз. Бул канаттуу ракеталарга да тиешелүү", — деген Шольц.
Канцлер Германия Украинага жардамын улантарын, мындай кадамдар Киев менен макулдашылып турарын кайрадан баса белгилеген. Согуш башталгандан тарта аталган өлкө Киев бийлигине жардам кылып 28 миллиард евро берген.
Дүйшөмбү күнү Германиянын канцлери Киевге Владимир Зеленский менен жолугуу үчүн келген. Сапар учурунда Шольц Украинага жаңы пакет менен жардам катары 650 миллион евро берилерин, анын ичинде Leopard 1 танкалары, согуштук түзүмдөр, Iris-T зениттик ракеталык комплекс бар экенин айткан.
Август айында немец ЖМКлары Германия өкмөтү кезектеги бюджетин пландашы үчүн Украинага караган аскердик жардамын кыскартууга мажбур болгондугун, кийинчерээк жаңы каражаттар бул максатка колдонулбастыгын жазган.
Мурда бекитилген жардам жөнөтүлө берилерин, бирок немецтик Коргоо минстрлигинен кошумча каралбастыгын, себеби бул боюнча канцлердин буйругу болгондугу айтылган. Анткен менен кийинчерээк Щольц Германия Украинага жардам кылууда Европа мамлекеттеринин ичинен ири донор катары кала берерин айткан эле.