БИШКЕК, 25-ноя. — Sputnik. Кыймылсыз мүлккө салык төлөөчүлөр көбөйүшү ыктымал. Бул тууралуу Бюджет, экономикалык жана фискалдык саясат боюнча комитетте белгилүү болду.
Жыйында Салык кодексине өзгөртүүлөр каралды. Депутат Данияр Төлөнов кыймылсыз мүлккө салык мындан ары 120 чарчы метрден жогору болгон үйлөргө дагы төлөнөрүн билдирген кайрылуу келгенин билдирди.
Анын айтымында, учурдагы Салык кодексинде батирлер 80, жеке үйлөр 150 чарчы метрден жогору болгондо кыймылсыз мүлккө салык төлөнөт.
Салык кызматы сунуштап жаткан өзгөртүү боюнча, эми жеке үйлөр 120 чарчы метрден баштап салык төлөмөкчү. Депутат мунун себебин сураганда Мамлекеттик салык кызматынын төрагасынын орун басары Нурлан Умтулов өлкөдөгү үйлөрдүн орточо аянты 122 чарчы метр экени аныкталганын айтты.