БИШКЕК, 23-ноя. — Sputnik. АКШ Конгресси Украинага жардам көрсөтүү боюнча мыйзамга Дональд Трамп кызматка киришкенде артка кайтара албагыдай өзгөртүүлөрдү киргизүүдө. Бул тууралуу The Hill басылмасына шилтеме кылып РИА Новости жазды.
Маалыматка ылайык, эгер мыйзам кабыл алынса, Трамп Украина үчүн тынымсыз аскердик жана экономикалык жардам сурап турууга милдеттүү болот.
"Эки партиядагы украиначылдар АКШнын Киевге колдоосуна байланыштуу жоболорду январга чейин өзгөртүүнү көздөөдө. Бул Трамптын бийликке келиши жана Республикалык партиянын Конгрессти көзөмөлгө алышынан улам коркунучка туш болчу жардамды коргоо аракети", — деп айтылат маалыматта.
Конгресстин төмөнкү палатасынын өкүлү билдиргендей, айрым конгрессмендер мыйзам долбоорунун жоболорун Улуттук коргонуу мыйзамына түзөтүү катары киргизүүгө ниеттенүүдө. Азырынча бул боюнча бирдиктүү пикирге келе албай жатышканы, бирок Трамп келгиче үч жума бар экени белгиленген.
Трамп Ак үйдүн украин жаңжалына мамилесин сынга алып, Зеленскийди келген сайын Вашингтондон миллиарддаган доллар жардам алган соодагерге теңеген. Ал ошондой эле жаңжалды сүйлөшүү жолу менен 24 сааттын ичинде чечүүгө жетише аларын айткан. Кремль мындай татаал маселени жөнөкөй жол менен чечүү кыйын экенин белгилеп келет.
Россия Батыштын аскердик жардамы Украина үчүн жакшылык алып келбей турганын жана жаңжалды гана узартып жатканын бир нече жолу билдирген.